ანჩისხატის ეკლესია მდებარეობს ქალაქის ისტორიულ ნაწილში, ზემო კალაში, მტკვრის მარჯვენა სანაპიროზე, შავთელის ქუჩაზე, მარიონეტების თეატრსა და სასტუმრო ამბასადორს შორის. ანჩისხატის ბაზილიკა თბილისის უძველესი ქრისტიანული ტაძარია, აგებული VI ს-ის დასაწყისში, ვახტან გორგასლის მემკდვირის, მეფე დაჩის მიერ. ეკლესია ღმრთისმშობლის შობის სახელობისაა. ანჩისხატი მას მხოლოდ XVII ს-ში ეწოდა, როცა აქ ანჩის (ანჩა ახლა თურქეთის ტერიტორიაზეა) მონასტრიდან წამოღებული სახელგანთქმული მაცხოვრის ხელთუქმნელი ხატი დაასვენეს. ეს სასწაულმოქმედი ხატი ედესის მეფე ავგაროზის ცნობილ ლეგენდას უკავშირდება. მაცხოვრის ხელთუქმნელი ხატის ისტორიის ამსახველი სცენები ტაძრის XIX ს-ის ფრესკებზეცაა წარმოდგენილი. ტაძარს `ზარის ეკლესიასაც~ უწოდებნენ. სავარაუდოდ ეს სახელწოდება არაბთა ბატონობის დროს, VIII-IX სს-ში გაჩნდა, როცა მხოლოდ ამ ეკლესიაში ირეკებოდა ღვთისმსახურების მაუწყებელი ზარები.საუკუნეების მანძილზე მრავალჯერ დაზიანებულმა ანჩისხატის ეკლესიამ არსებითად შეინარჩუნა თავისი პირვანდელი სახე. ანჩისხატი სამნავიანი ბაზილიკაა. იგი ქართული ხუროთმოძღვრების განვითარების ადრეული ეტაპის უმნიშვნელვანეს ძეგლთა ჯგუფს მიეკუთვნება. XV-XVII სს-ში ირანელთა მიერ თბილისის არაერთგზის აოხრების დროს დაზიანებული ანჩისხატის ეკლესია XVII ს-ში აღადგინეს. ამავე პერიოდში ფრესკებით შეამკეს ტაძრის ინტერიერიც. 1675 წელს ეკლესიის დასავლეთით აგურის ორსართულიანი სამრეკლო აშენდა. მისი პირველი სართული კარიბჭეს წარმოადგენს, რომელიც ქვის კიბით ანჩისხატის ეკლესიას უკავშირდება. სამრეკლო საყურადღებოა ფასადებზე ირანული არქიტექტურის ელემენტების გამოყენების მხრივ. შუა საუკუნეეებში ანჩისხატი საქართველოს კათოლიკოს-პატრიარქთა კარის ეკლესია იყო. ანჩისხატთან არსებობდა კალიგრაფიული და ლიტერატურული სკოლაც.