ცხელი ხაზი 272 22 22
13:46 22/12/2014
გამოიწერეთ სიახლეები ელ. ფოსტაზე
 

ნაძალადევის რაიონში, გზებზე სარემონტო სამუშაოები გრძელდება. რაიონის გამგებელმა ზაზა გაბუნიამ ლოტკინზე, ნაქალაქევის ქუჩაზე მიმდინარე სამუშაოები დაათვალიერა. ქუჩის დიდ ნაწილზე, 2 500 კვ/მ ფართობზე, დაიგო 2 ფენა ასფალტი და შეკეთდა სანიაღვრე სისტემა. გზის სარეაბილიტაციო სამუშაოები ნაძალადევის გამგეობის დაკვეთით შესრულდა.
ზაზა გაბუნია ნაქალაქევის ქუჩის მოსახლეობასაც შეხვდა და მათ პრობლემებს გაეცნო. მისი თქმით, რაიონში გზების რეაბილიტაციის პროცესს, გამგეობა მომავალ წელსაც აქტიურად გააგრძელებს - "ნაძალადევში ერთ-ერთი ყველაზე დიდი პრობლემა საგზაო ინფრასტრუქტურის მოწესრიგებაა, ამ მხრივ ბევრი პრობლემა დაგვხვდა. ვცდილობთ, ეტაპობრივად გამოვასწოროთ გზების მდგომარეობა, რათა მოქალაქეებს ქუჩებზე ავტომანქანით გადაადგილების დროს დაბრკოლება აღარ შეექმნათ" - განაცხადა ზაზა გაბუნიამ.

სიახლე
22 დეკემბერი 2014  
 
 

ნაძალადევის რაიონში სპორტული მოედნების რეაბილიტაციის პროცესი აქტიურ ფაზაშია. რაიონის გამგებელმა ზაზა გაბუნიამ მოსახლეობასთან ერთად დღეს თემქაზე, 48-ე სკოლის ეზოში მდებარე განახლებული სტადიონი გახსნა. 450 კვ/მ ფართობის მოედანზე დაიგო ახალი, ხელოვნური მწვანე საფარი, განახლდა ფეხბურთისა და კალათბურთის კარები; სპორტული მოედნის გარშემო დამონტაჟდა ახალი ტექნოლოგიის ლითონის ბადე, რომელიც უსაფრთხოების მიზნით მოქცეულია პლასტმასის კონსტრუქციაში.
ნაძალადევის გამგებლის ზაზა გაბუნიას თქმით, დეკემბრის ბოლომდე კიდევ 3 სტადიონის რეაბილიტაცია დასრულდება.

 

სიახლე
13 დეკემბერი 2014  
 
 

პოლიტკოვსკაიას ქუჩაზე, N18ა-ს მიმდებარე ტერიტორიაზე, 2 000 კვ.მ-ზე ეზოს სარეაბილიტაციო სამუშაოები აქტიურად მიმდინარეობს. სამუშაო პროცესს თბილისის მერი დავით ნარმანია და ვაკის რაიონის გამგებელი გივი ჭიჭინაძე გაეცნენ.
პოლიტკოვსკაიას N18ა-ში 2002 წელს თბილისში მომხდარი მიწისძვრით დაზარალებული 107 ოჯახი ცხოვრობს. მათ საკუთარი პრობლემების მოგვარების თხოვნით თბილისის მერიის შესაბამის სამსახურებს მოსახლეობის მიღების დღეს მიმართეს. მათ შორის, ითხოვდნენ არსებული ეზოს მოწესრიგებასაც.
ამ დროისთვის დასრულებულია მიწის სამუშაოები, მოწესრიგდა მიწისქვეშა კომუნიკაციები, განხორციელდა დიდი რაოდენობის სამშენებლო ნარჩენების კორპუსის ტერიტორიიდან გატანა, ამჟამად კი ადგილზე ასფალტი იგება.
ქუჩის სარეაბილიტაციო სამუშაოები წლის ბოლომდე დასრულდება. მომავალ წელს კი აღნიშნულ ტერიტორიაზე სკვერი და სპორტული მოედანი მოეწყობა. სკვერისა და სპორტული მოედნის მოსაწყობად მოსამზადებელი სამუშაოები უკვე დაწყებულია. სამუშაოებს ვაკის რაიონის გამგეობა დააფინანსებს.

სიახლე
20 დეკემბერი 2014  
 
 

თბილისის მერიასა და ირლანდიის დედაქალაქ დუბლინის მერიას შორის ურთიერთგაგების მემორანდუმი გაფორმდა. დედაქალაქის მერის ირლანდიაში ვიზიტის ფარგლებში, მემორანდუმს ხელი მოაწერეს დავით ნარმანიამ და დუბლინის ლორდ მერმა ქრისტი ბრუკმა.
მემორანდუმის თანახმად, მხარეები ერთმანეთს გაუზიარებენ ცოდნასა და გამოცდილებას ეკონომიკის, კულტურის, განათლების, ტურიზმის, საზოგადოებრივი ტრანსპორტის, გარემოს დაცვის, მყარი ნარჩენების მართვისა და ადგილობრივი მმართველობის სფეროში.
როგორც ირლანდიიდან დაბრუნებულმა თბილისის მერმა დღეს გამართულ ბრიფინგზე ოფიციალური ვიზიტის შეჯამებისას განაცხადა, თბილისი და დუბლინი ორ ძალიან მნიშვნელოვან - გამწვანების და საცობების მართვის საკითხებში ითანამშრომლებენ.
„მე უკვე მოვიწვიე ორი სპეციალისტი ირლანდიიდან, რომლებიც შეისწავლიან დედაქალაქის სატრანსპორტო სისტემის მართვის ნაწილს და გაგვიწევენ რეკომენდაციებს, როგორ განვავითაროთ იგი თანამედროვე ტექნოლოგიების გამოყენებით, რათა შევძლოთ საცობების მართვა“ - განაცხადა დავით ნარმანიამ.
მისი თქმით, სხვა პრიორიტეტებს შორის, ერთ-ერთი უმთავრესი პრიორიტეტი დედაქალაქში ეკოლოგიური მდგომარეობის გაუმჯობესებაა, ამდენად, ძალიან  მნიშვნელოვანია ირლანდიის მიდგომები ამ კუთხით. მისივე თქმით, ქართული მხარე დაამუშავებს მათ მოდელს და საუკეთესო პრაქტიკაზე დაყრდნობით გააუმჯობესებს დედაქალაქის ეკოლოგიურ მდგომარეობას.

 

 

 

 

 

 

 

სიახლე
12 დეკემბერი 2014  
 
 

შპს „ჰერმესმა“ მის მართვის ქვეშ არსებულ თბილისის მუნიციპალურ სასაფლაოებზე, წლების განმავლობაში დაგროვილი ნაგვის კერების დასუფთავება დაიწყო. აღნიშნული კერები ანტისანიტარიას ქმნიდა, რაც ხშირ შემთხვევაში დიდ პრობლემას წარმოადგენდა, როგორც ჭირისუფალთათვის ასევე სასაფლაოების მიმდებარე ტერიტორიაზე მცხოვრები მოსახლეობისთვის.
დასუფთავების პროცესი დღეს ”თბილესრვისთან” ერთად ჩატარდა და საჭიროების მიხედვით მომავლშიც გაგრძელდება.

სიახლე
20 დეკემბერი 2014  
 
 

მედიასაშუალებებით გავრცელებული ინფორმაცია, რომ საქართველოს პროკურატურის წარმომადგენლები იმყოფებიან თბილისის მერიაში და მიმდინარეობს საგამოძიებო მოქმედებები "თბილისობის" დღესასწაულთან დაკავშირებული შესყიდვის დოკუმენტაციის ამოღების მიზნით, სიმართლეს არ შეესაბამება.
საზოგადოებას ვაცნობებთ, რომ აღნიშნულ საკითხზე მთავარ პროკურატურაში მიმდინარეობს გამოძიება ხსენებული შესყიდვების კანონიერების დასადგენად და გამოძიების პროცესში თბილისის მერია აქტიურად არის ჩართული.
ვინაიდან საზოგადოებაში გაჩნდა კითხვები "თბილისობის" დღესასწაულთან დაკავშირებით განხორციელებულ შესყიდვებზე, თბილისის მერია გამოძიებას მიაწოდებს სრულ დოკუმენტაციას, რისი მოგროვების პროცესიც მიმდინარეობს და აპირებს მჭიდრო თანამშრომლობის გაგრძელებას გამოძიებასთან სიმართლის დასადგენად.

სიახლე
9 დეკემბერი 2014  
 
 

კვლევითი სამუშაოებისთვის მეტეხის გვირაბის თითო მხარე 3-3 დღით დაიკეტება. კვლევით სამუშაოებს საქართველოს ტექნიკურ უნივერსიტეტთან არსებული ხიდსაცდელი ცენტრი ჩაატარებს. ჩატარდება აზომვითი სამუშაოები, მოხდება გვირაბის გარშემო სიცარიელეების, ნაგებობის მდგრადობის, ბეტონის ვარგისიანობის შემოწმება, შიდა კომუნიკაციების მდგომარეობის შესწავლა. ექსპერტიზის დასრულების შემდეგ, შედეგებიდან გამომდინარე, დაისახება შემდგომი სამოქმედო გეგმა.
სამუშაოები სპეციალური პროგრამის ფარგლებში ხორციელდება, რომლითაც ხდება 20 ხიდისა და 1  გვირაბის კვლევა, თუ რა მდგომარეობაშია ნაგებობები, რა სამუშაოები და თანხებია საჭირო მათი ნორმალური ექსპლუატაციისთვის.

 

 

სიახლე
19 დეკემბერი 2014  
 
 

დედაქალაქი საახალწლო ილუმინაციებით ფორმდება. მაგისტრალების, ქუჩების, სკვერების, მორთვა თბილისის ყველა უბანში ერთდროულად მიმდინარეობს.რუსთველის გამზირზე უკვე დასრულდა საქართველოს პარლამენტის შენობის გაფორმება, შენობის წინ დამონტაჟდა მანათობელი ანგელოზის ფიგურები და ყვავილები. დედაქალაქის მთავარი, 25 მეტრიანი ნაძვის ხე პარლამენტის შენობის წინ დაიდგმება. ტრადიციული ნაძვის ხის კომპოზიცია აეწყობა თავისუფლების მოედანზე, წმინდა გიორგის მონუმენტზე. კომპოზიციის ავტორია მხატვარი მურაზ მურვანიძე.
საახალწლო განათებების მონტაჟი ასევე დასრულებულია ვაჟა-ფშაველას, ალექსანდრე ყაზბეგის, გროგოლ რობაქიძის, ნოდარ დუმბაძის და დავით გურამიშვილის გამზირებზე. მორთულია ბარათაშვილის აღმართი, გლდანულას შესახვევი, მელაანის, ბუშის და ლეხ კაჩინსკის ქუჩები.
საახალწლო ილუმინაციებით დედაქალაქის გაფორმების სამუშაოები 20 დეკემბრისთვის დასრულდება. სამუშაოებს  ტენდერში გამარჯვებული შპს „სინათლის ქალაქი“ ასრულებს.

სიახლე
30 ნოემბერი 2014  
 
 

თბილისის საკრებულო დღეს დედაქალაქის 2015 წლის ბიუჯეტის პროექტს იხილავს. ჯანდაცვისა და სოციალური დაცვის პროგრამების გაზრდა, საბავშვო ბაგა-ბაღების რეაბილიტაცია-მშენებლობა, დედაქალაქის გამწვანება, ინფრასტრუქტურის მოწესრიგება - ეს ის ძირითადი პრიორიტეტებიაა, რაზეც თბილისის მერმა დავით ნარმანიამ საკრებულოს სხდომაზე გამოსვლისას გაამახვილა ყურადღება.

სიახლე
19 დეკემბერი 2014  
 
 

მთაწმინდის რაიონში, გოგებაშვილის ქუჩაზე, გზის სავალი ნაწილის მოასფალტება მიმდინარეობს.  სარეაბილიტაციო სამუშაოები, რომელიც 4 ოქტომბერს დაიწყო, დღეს თბილისის მერმა, დავით ნარმანიამ, კეთილმოწყობის საქალაქო სამსახურის უფროსთან, ავთანდილ სუდაძესთან და მთაწმინდის გამგებელთან, გელა არჩვაძესთან ერთად დაათვალიერა.
„ჩვენ მოსახლეობას დავპირდით და დათქმულ ვადაში ვასწრებთ სარეაბილიტაციო სამუშაოებს. გოგებაშვილის ქუჩაზე სამუშაოების ძირითადი ნაწილი მიმდინარე თვის ბოლომდე დასრულდება. დღეს იგება გზის პირველი საფარი, რის შემდეგაც დაიგება მეორე ფენა. გარდა ამისა, ინტენსიურად  მიმდინარეობს დაზიანებული გზების შეკეთება  დედაქალაქის სხვა რაიონებშიც, რათა ზამთრის პერიოდს მომზადებული შევხვდეთ და უმტკივნეულოდ გადავიტანოთ“ - განაცხადა დავით ნარმანიამ.
თბილისის მერიის კეთილმოწყობის საქალაქო სამსახურის უფროსის ავთანდილ სუდაძის თქმით, პროექტის ფარგლებში კაპიტალურად შეკეთდება მთლიანი ქუჩა საერთო ფართობით - 5 600 კვადრატული მეტრი. მისივე თქმით, უკვე დასრულდა გრუნტის მოწყობის, აგრეთვე, წყლისა და კანალიზაციის ჭების ამოწევის სამუშაოები, დასასრულს უახლოვდება ბორდიურებისა და ტროტუარების მოწყობა.
სარეაბილიტაციო სამუშაოებს „სამშენებლო სატრანსპორტო კომპანია“ ახორციელებს.

 

 

 

სიახლე
21 ნოემბერი 2014  
 
 

საბურთალოს რაიონის გამგებელმა ბექა მიქაუტაძემ და საბურთალოს რაიონის მაჟორიტარმა დეპუტატმა დავით ზურაბიშვილმა ჩიქოვანის ქუჩაზე მიმდინარე საყრდენი კედლების მშენებლობის და გზის სარეაბილიტაციო სამუშაოები დაათვალიერეს. 
ვიქტორ დოლიძის N138-დან N136-მდე და N130-ის მოპირდაპირე მხარეს საყრდენი კედლის მშენებლობისა და გზის სავალი ნაწილის რეაბილიტაციის მოთხოვნით საბურთალოს მაჟორიტარი დეპუტატის ბიუროს მოსახლეობამ მიმართა. 
„ეს არის ადგილი, რომელიც ქალაქის ცენტრშია და იყო აბსოლუტურად უყურადღებოდ მიტოვებული. გზა იყო ჩანგრევის პირას, რამდენიმე მანქანის გადავარდნის შემთხვევაც იყო. მივმართეთ გამგეობას, მათ მოინდომეს, დამტკიცდა პროექტი და ჩატარდა გამაგრებითი სამუშაოები“, - განაცხადა დავით ზურაბიშვილმა. 
პროექტის ფარგლებში გაკეთდა სამი საყრდენი კედელი, რითაც მოხდა მთის ფერდობის მეწყერული ზონების შეკავება დაცურებისგან. შემდეგ ეტაპზე დაიგება გზა და მოწესრიგდება კომუნიკაციები. 
„ჩვენ აქ სამი საყრდენი კედელი გავაკეთეთ, რომელიც საშუალებას მოგვცემს, რომ შემდგომში გზა დავაგოთ და კომუნიკაციები მოვაწესრიგოთ. კეთდება კიდევ დამატებით სამი კედელი. გვინდა, რომ ეს მთა გავამაგროთ, რომელიც საფრთხეს უქმნიდა მოსახლეობას“, - განაცხადა ბექა მიქაუტაძემ.

სიახლე
19 დეკემბერი 2014  
 
 

ქ. თბილისის მუნიციპალიტეტის მერიაში, ყოფილი მთავრობის პირობებში დამკვიდრებული იყო პრაქტიკა, რომლის თანახმად, სახელმწიფო შესყიდვების შესახებ გამოცხადებულ ელექტრონულ ტენდერში, ტენდერის მონაწილე პრეტენდეტების მიერ, სატენდერო წინადადების სახით, ცალკეულ შემთხვევებში ხდებოდა მხოლოდ რეკვიზიტების წარმოდგენა, რაც მიზანმიმართულად ხელს უწყობდა ტენდერის მიმდინარეობის პროცესის ხელოვნურ გაჭიანურებას. ამასთან, აღსანიშნავია, რომ რეკვიზიტების წარმოდგენა არ იყო გათვალისწინებული ინფრასტრუქტურულ პროექტებთან დაკავშირებული ელექტრონული ტენდერების სატენდერო მოთხოვნებით.
2014 წლის სექტემბრიდან, არსებითად უარყოფილი იქნა ზემოხსენებული მავნე პრაქტიკა და პრეტენდენტის მიერ მხოლოდ რეკვიზიტების წარმოდგენის შემთხვევაში, სატენდერო კომისია, საქართველოს კანონმდებლობის სრული დაცვით, ზემოხსენებულ პრეტენდენტს ანიჭებს დისკვალიფიკაციას. ქ. თბილისის მუნიციპალიტეტის მერიის მიერ, სახელმწიფო შესყიდვების შესახებ გამოცხადებული ელექტრონული ტენდერის მონაწილე პრეტენდენტები ვალდებულნი არიან სახელმწიფო შესყიდვების სააგენტოს პორტალზე - სახელმწიფო შესყიდვების ერთიან ელექტრონულ სისტემაში - თავიდანვე სრულყოფილად წარმოადგინონ სატენდერო დოკუმენტაციით გათვალისწინებული დოკუმენტები.
დამატებით გაცნობებთ, რომ აღნიშნულთან დაკავშირებით, სახელმწიფო შესყიდვების სააგენტოს დავების განხილვის საბჭოში, ქალაქ თბილისის მუნიციპალიტეტის მერიის წინააღმდეგ, ელექტრონულ ტენდერში მონაწილე პრეტენდენტების მიერ (რომლებმაც სატენდერო წინადადებით ატვირთეს  რეკვიზიტები)  წარდგენილი იქნა ორი საჩივარი, რომელთაგან ერთი (SPA140020932 ელექტრონულ ტენდერთან დაკავშირებით) გადაწყდა შემსყიდველი ორგანიზაციის სასარგებლოდ, ხოლო მეორე  (SPA140021523 ელექტრონულ ტენდერთან დაკავშირებით)   საბჭოს მიერ დაუშვებლად იქნა მიჩნეული.

 

სიახლე
21 ნოემბერი 2014  
 
 

დღეს საკრებულოს უმცირესობის წევრებმა გაავრცელეს ცრუ ინფორმაცია, თითქოს 2015 წლიდან თბილისში რეგისტრირებული ოჯახების კომუნალური სუბსიდირების პროგრამის ბიუჯეტი მცირდება. რეალურად, 2015 წლიდან სოციალურად დაუცველი ოჯახებისთვის არსებული შეღავათები გაორმაგდება და, 250 ლარის ნაცვლად, მათზე 500-ლარიანი სუბსიდია გაიცემა, ხოლო ყველა დანარჩენ ოჯახს 2015 წლის პირველი 3 თვის განმავლობაში, ჩვეულებრივ ჩაერიცხება 20 ლარი თვეში, როგორც ეს წინა წლებში ხორციელდებოდა.
სამწუხაროდ, დღეს არსებული პროგრამის ადმინისტრირების მექანიზმები არ იძლევა იმის საშუალებას, რომ ოჯახებზე, რომლებიც არ არიან რეგისტრირებულები სოციალურად დაუცველთა ბაზაში,  მიზნობრივად გაიცეს კომუნალური სუბსიდიის თანხა მათი საჭიროების შესაბამისად. პროგრამის ხარვეზის გამო, დახმარებას იღებენ როგორც შეჭირვებული, ისე სოლიდური შემოსავლის მქონე ოჯახები, რაც ცალსახად არასწორი მენეჯმენტის შედეგია.
პროგრამის სრულყოფის მიზნით, დახმარების მიზნობრიობის გაუმჯობესებისათვის, 2015 წელს შეიქმნება სამუშაო ჯგუფი, რომელიც მომდევნო წლის განმავლობაში შეიმუშავებს არა სოციალურად დაუცველი, მაგრამ კომუნალური სუბსიდიის საჭიროების მქონე ოჯახებისათვის დახმარების მიზნობრივად გაცემის მექანიზმებს და, მიღებული შედეგების შესაბამისად, 2015 წლის ნოემბერსა და დეკემბერში განხორციელდება ასეთი საჭიროების მქონე ოჯახების დამატებითი სუბსიდირება.
რაც შეეხება საბავშვო ბაღის პედაგოგებისთვის უფასო მგზავრობის საკითხს, ის საჭიროებს თბილისის მთავრობის გადაწყვეტილებას, რაც 2015 წლის ბიუჯეტის დამტკიცებისთანავე იქნება მიღებული.
მივმართავთ საკრებულოს უმცირესობის წევრებს, ნუ ავრცელებენ არასწორ ინფორმაციას და შეგნებულად ნუ შეიყვანენ შეცდომაში თბილისის მოსახლეობას.

 

სიახლე
17 ნოემბერი 2014  
 
 

„ვისოლ ჯგუფმა“ საბურთალოზე, ცინცაძის ქ.N#37 სუპერმარკეტ „სმარტის“ და ამერიკული რესტორნის ქსელის „ვენდის“ ახალი ობიექტები გახსნა. საბურთალოს ობიექტი „სმარტისთვის“ მეთოთხმეტე სუპერმარკეტია, ხოლო „ვენდის“ რესტორანი - უკვე მეოთხე ობიექტი.
ორივე ქსელში მომხმარებელს შესაძლებლობა აქვს მაღალი ხარისხის პროდუქცია და მომსახურება ხელმისაწვდომ ფასებში მიიღოს. ახალ სავაჭო ობიექტში 300-მდე ადამიანი დასაქმდა.
„ვენდისა" და „სმარტის“ გახსნას თბილისის ვიცე-მერი ალექსანდრე მარგიშვილი, „ვისოლო ჯგუფის“ ხელმძღვანელები და სხვა მოწვეული სტუმრები დაესწრნენ.

სიახლე
19 დეკემბერი 2014  
 
 

თბილისის მერი დავით ნარმანია საქართველოში შვედეთის ელჩს, მარტინა ქვიქს შეხვდა. შეხვედრაზე ისაუბრეს მუნიციპალური პროექტების ევროპული სტანდარტებით მომზადებაში შვედური მხარის თანამონაწილეობის შესახებ. აღინიშნა, რომ ამ მიმართულებით შვედეთი თბილისის მერიას აქტიურ მხარდაჭერას გაუწევს.
დავით ნარმანიას განცხადებით, შვედეთის საელჩო აქტიურად მუშაობს საქართველოში რამდენიმე მიმართულებით. მისივე თქმით, ქართული მხარისთვის განსაკუთრებით საინტერესოა შვედეთის გამოცდილების გაზიარება ნარჩენების მართვის სფეროში.

 

 

 

 

 

 

სიახლე
17 ნოემბერი 2014  
 
 

საკრებულოში დღეს პუშკინის ქუჩაზე ორმხრივი მოძრაობის აღდგენასთან დაკავშირებული 11 პროექტის საჯარო განხილვა გაიმართა. პრეზენტაციას საკრებულოს დეპუტატები, თბილისის მერი და თავად პროექტის ავტორები ესწრებოდნენ. დავით ნარმანიას თქმით, საჯარო განხილვა მნიშვნელოვანია, რომ ყველა მხარის პოზიცია იყოს დაფიქსირებული და მოსმენილი.
„ძალიან საინტერესო 11 იდეა მოვისმინეთ. ეს პრობლემა წინა ხელისუფლებამ დაგვიტოვა - ვერც ისტორიული მემკვიდრეობა შევინარჩუნეთ და სანაცვლოდ კი მივიღეთ საცობები. კონკურსის შედეგად შევარჩევთ პროექტს, რომლითაც ქალაქის ეს ნაწილი საცობებისგან განიტვირთება“, - განაცხადა ნარმანიამ.
როგორც შეხვედრის დასრულების შემდეგ საკრებულოს თავმჯდომარემ, გიორგი ალიბეგაშვილმა აღნიშნა, პროექტები, რომელიც შეხვედრაზე იყო წარმოდგენილი, ქალაქის იერსახის შენარჩუნებას და საგზაო მოძრაობის განტვირთვას ითვალისწინებს.
„ასევე გათვალისწინებულია, თუ როგორ იმოძრავებენ ფეხით მოსიარულეები პუშკინის ქუჩაზე. სხვადასხვა კარგი მოსაზრების აღება უნდა მოხდეს და მათი კომბინირება უნდა გაკეთდეს. არ არის გამორიცხული, მოხდეს ამ პროექტების ერთგვარი გაერთიანება“, - განაცხადა გიორგი ალიბეგაშვილმა. 
პუშკინის ქუჩაზე ორმხრივი სატრანსპორტო მოძრაობის აღდგენის კონცეფციის შექმნაზე თბილისის მერიის სსიპ „თბილისის არქიტექტურის სამსახურმა“ კონკურსი მიმდინარე წლის 30 ოქტომბერს გამოაცხადა. კონკურსში მონაწილეობის უფლება ჰქონდა ნებისმიერ ფიზიკურ და იურიდიულ პირს, გარდა შემსყიდველი ორგანიზაციის თანამშრომლებისა და აღნიშნული კონკურსის ორგანიზებაში ჩართული პირებისა.

სიახლე
18 დეკემბერი 2014  
 
 

მუნიციპალიტეტებში მოხელეების სამსახურიდან გათავისუფლებასთან დაკავშირებით სახალხო დამცველის 10 ნოემბრის განცხადებაში დიდუბის რაიონის შესახებ მოყვანილი ფაქტები არის სრული სიცრუე. სახალხო დამცველის აპარატის თანამშრომლებს გამგეობაში კვლევა არასოდეს ჩაუტარებიათ. გარდა ამისა, სიმართლეს არ შეესაბამება განცხადება, თითქოს დიდუბის რაიონის გამგეობაში ყოველდღიურად ცხადდებოდნენ უცხო პირები, რომლებიც თანამშრომელთა მოვალეობებს ასრულებდნენ.
სასურველია, სახალხო დამცველის აპარატმა წარმოადგინოს სახელები, გვარები და მეტი დეტალები იმ ადამიანებთან დაკავშირებით, რომელთა არსებობის შესახებ, როგორც თვითონ ამბობს, კვლევის შედეგად შეიტყვეს. რაც შეეხება პირს, რომელიც, თურმე, ყოველგვარი სტატუსის გარეშე ცხადდებოდა გამგეობაში და სოციალურ განყოფილებაში გამგებლის სხვა და სხვა დავალებებს ასრულებდა, ვფიქრობთ, რომ აქ იგულისხმება ბატონი ზურაბ უგულავა. სამწუხაროდ, სახალხო დამცველი არ საუბრობს იმაზე, რომ ზურაბ უგულავამ 2014 წლის 2 სექტემბერს, ხელშეკრულების საფუძველზე დაიწყო მუშაობა დიდუბის რაიონის გამგეობის ინფრასტრუქტურის განყოფილებაში, რაც კიდევ ერთხელ ადასტურებს, რომ სახალხო დამცველის აპარატს დიდუბის გამგეობიდან ინფორმაცია არ გაუთხოვია.
აქვე, განვმარტავთ, რომ ზურაბ უგულავას არასოდეს არანაირი შეხება არ ჰქონია სოციალურ განყოფილებასთან. 17 სექტემბერს გამგებლის მოადგილის მოვალეობის შემსრულებლად დაინიშნა თეა დარახველიძე, რომლის საკურატორო სფეროა სოციალური განყოფილება, ხოლო ზურაბ უგულავა 2014 წლის 3 ნოემბერს დაინიშნა გამგებლის მოადგილედ და მის საკურატორო სფეროს ინფრასტქუტურის განყოფილება წარმოადგენს.  

 

სიახლე
12 ნოემბერი 2014  
 
 

შპს „ჰერმესის“ სამეურნეო განყოფილების სპეციალისტს, მურმან ჩ-ს, რომელიც ფინანსთა სამინისტროს საგამოძიებო სამსახურმა დღეს დააკავა, არ ჰქონდა შეხება გადასვენების და სასაფლაოს გაყიდვის საკითხებთან. მიუხედავად ამისა, მოქალაქეს დაპირდა, რომ გადასვენებაში და სასაფლაოს ყიდვაში გარკვეული საფასურის სანაცვლოდ დაეხმარებოდა. აღნიშნული პიროვნება "ჰერმესში" ბოლო ერთი წლის განმავლობაში მთავარ სპეციალისტად მუშაობდა, ხოლო დაახლოებით ერთი თვის წინ ის დაქვეითდა და წამყვანი სპეციალისტის პოზიციაზე გადავიდა.
მოსახლეობას ვაცნობებთ, რომ მოქალაქეებს სასაფლაოს ყიდვა სასაფლაოს ადმინისტრაციასთან შეთანხმებით და შესაბამის საბანკო ანგარიშზე თანხის გადარიცხვით შეუძლიათ. მომხმარებელს მისთვის საჭირო მომსახურების მიღება ასევე შეუძლია ელექტრონულად, „ჰერმესის“ ვებ-გვერდის მეშვეობით. შესაბამისად, მოვუწოდებთ საზოგადოებას, ყველა საჭირო ინფორმაციას გაეცნოს კომპანიის ვებ-გვერდზე ან უშუალოდ „ჰერმესის“ ადმინისტრაციაში, რათა თავიდან ავიცილოთ კერძო უკანონო გარიგებები.

 

 

 

 

 

 

სიახლე
18 დეკემბერი 2014  
 
 

შარტავას ქუჩაზე მიმდინარე გადაუდებელი, ტექნიკური სამუშაოების გამო, რომელსაც კომპანია "სილქნეტი" ახორციელებს, 7 ნოემბერს საღამოს 19:00 საათიდან - 02:00 საათამდე  მომხმარებლები ვერ შეძლებენ თბილისის მერიის ვებ-გვერდით სარგებლობას, რადგან ელექტრონულ მომსახურეობაზე წვდომა დროებით იქნება შეფერხებული. 

სიახლე
6 ნოემბერი 2014  
 
იხილეთ მეტი