16:10     01/10/2014   Tbilisi.gov.ge
   
სიახლეების გამოწერა
სიახლეების გამოსაწერად მიუთითეთ თქვენი ელ-ფოსტა.

 
 

"საქართველოს არქიტექტორთა ასოციაციის", ჟურნალი „STYLE“-ის ეგიდით, თბილისის მერიისა და მერიის არქიტექტურის სამსახურის მხარდაჭერით, თბილისში არქიტექტურის მესამე საერთაშორისო ფესტივალი გაიმართა.
ფესტივალის ფარგლებში, პარლამენტის ეროვნულ ბიბლიოთეკაში გაიმართა გამოფენა-კონკურსი ,,არქიტექტურული პრემია - 2014“, რომელშიც მონაწილეობა მიიღო 135-მა არქიტექტორმა და დიზაინერმა აზერბაიჯანიდან, თურქეთიდან, ბულგარეთიდან და უნგრეთიდან. კონკურსზე წარმოდგენილი 170 ნამუშევარი 32-კაციანმა საერთაშორისო ჟიურიმ შეაფასა.
კონკურსის ნომინაციებში გამარჯვებულ საუკეთესო არქიტექტურული და დიზაინერული  ნამუშევრების ავტორებს თბილისის მერის მოადგილემ, ნინა ხატისკაცმა "არქიტექტურული პრემია 2014"-ის ლაურეატის დიპლომები, ხოლო მერიის არქიტექტურის სამსახურმა საჩუქრად პლანშეტები გადასცეს.
საერთაშორისო კონკურსი "არქიტექტურული პრემია - 2014" საცხოვრებელი, საზოგადოებრივი სივრცის, შენობების, ინტერიერისა და დიზაინის სფეროს მოიცავდა. ყოველწლიური კონკურსის მიზანია საუკეთესო პროექტების წარმოჩენა და იმ არქიტექტორებისა თუ დიზაინერების გამოვლენა, რომელთაც თავისი წვლილი შეაქვთ არქიტექტურის განვითარების საქმეში.

 

 

 

სიახლე
1 ოქტომბერი 2014  
 
 

გერმანიაში ვიზიტით მყოფი თბილისის მერი დავით ნარმანია ბერლინის მერს, კლაუს ვოვერაიტს შეხვდა. შეხვედრაზე დავით ნარმანიამ ხაზი გაუსვა კლაუს ვოვერაიტის დამსახურებას ბერლინის განვითარებაში და თბილისში მუნიციპალური მენეჯმენტის ბერლინური გამოცდილების გაზიარების სურვილი გამოთქვა.
როგორც დავით ნარმანიამ შეხვედრაზე აღნიშნა, ევროკავშირთან ასოცირების ხელშეკრულების ხელმოწერის შემდეგ, მნიშვნელოვანია ევროპული სტანდარტების დანერგვა ქალაქდაგეგმარების, ინფრასტრუქტურის მოწესრიგების, მუნიციპალური ტრანსპორტის, ნარჩენების მართვისა თუ ენერგოეფექტიანობის კუთხით. მისივე თქმით, თბილისის მთავრობა მუნიციპალური ინფრასტრუქტურის ახალ სტანდარტებზე იწყებს მუშაობას, რაშიც ევროკავშირის ქვეყნების გამოცდილებას გაიზიარებს. მერები, ასევე, შეთანხმდნენ, რომ ყველა ძირითად მიმართულებაზე, რომელიც მუნიციპალური მომსახურების სფეროს გაუმჯობესებას ითვალისწინებს, გერმანული მხარე თბილისს დახმარებას გაუწევს.
გერმანული გამოცდილების გაზიარება მოხდება, ასევე, ქალაქდაგეგმარების საკითხშიც. თბილისის მერი დეტალურად გაეცნო გერმანული პროექტის - მომავლის ქალაქის კონცეფციას, რომლის ძირითადი ასპექტებიც თბილისის სამომავლო განვითარებისთვის, შესაძლოა, საინტერესო აღმოჩნდეს.
შეხვედრაზე, ასევე, ხაზი გაესვა ორ ქალაქს შორის თანამშრომლობას კულტურის სფეროში. განსაკუთრებული აქცენტი კულტურული მემკვიდრეობის დაცვის საკითხზე და ამ მხრივ გერმანული გამოცდილების გაზიარებაზე გაკეთდა.
ამასთან, თბილისის მერი გამოვიდა ინიციატივით, რომ თბილისში ბერლინის სახელობის ქუჩა ან სკვერი გაიხსნას, ხოლო ბერლინის მერმა აიღო ვალდებულება, რომ დაიწყება მუშაობა ბერლინის ერთ-ერთი მოედნისთვის თბილისის სახელის მინიჭებაზე.

სიახლე
1 ოქტომბერი 2014  
 
 

ბერლინში სამუშაო ვიზიტად მყოფმა ქართულმა დელეგაციამ, რომლის შემადგენლობაშიც თბილისის მერი დავით ნარმანია, საქართველოს რეგიონული განვითარებისა და ინფრასტრუქტურის მინისტრი დავით შავლიაშვილი, აჭარის მთავრობის თავმჯდომარე არჩილ ხაბაძე, ქუთაისის მერი შოთა მურღულია და სხვა ოფიციალური პირები შედიან, ბერლინში არსებული ნარჩენების გადამამუშავებელი საწარმო დაათვალიერა. ეს არის თანამედროვე ტექნოლოგიებით აღჭურვილი საწარმო, სადაც, ნარჩენების გადამუშავების შედეგად, თბო და ელექტროენერგია მიიღება.
დავით ნარმანიას განცხადებით, თბილისისთვის ძალიან მნიშვნელოვანია იმ ძირითადი მიდგომების გაზიარება, რასაც ნარჩენების მართვის მენეჯმენტში გერმანია მრავალი წელია, უკვე იყენებს. თბილისის მერმა გერმანული მხარისგან კონბინირებული ტარიფის შესახებაც დეტალური ინფორმაცია მიიღო. კონბინირებული ტარიფი მოხმარებული ნარჩენის რაოდენობის შესაბამის გადასახადს გულისხმობს.
თბილისის მერიამ უკვე დაიწყო გერმანიის რეკონსტრუქციისა და განვითარების ბანკთან თანამშრომლობა, რომლის ფარგლებშიც ნარჩენების მართვის სამომავლო სტრატეგია უნდა შემუშავდეს.

 

 

 

 

 

სიახლე
1 ოქტომბერი 2014  
 
 

თბილისის მერის მოადგილე გიორგი სოლომონია და თბილისის მერიის ადმინისტრაციის უფროსი რევაზ ჩახავა პოლონეთში, ქალაქ ლუბლინში, 1-4 ოქტომბერს, აღმოსავლეთ პარტნიორობის თემაზე დაგეგმილ სემინარს დაესწრებიან. სემინარი სახელწოდებით - „მრავალმხრივი ურთიერთობების დამყარება აღმოსავლეთ პარტნიორების ქალაქებსა და ქვეყნებს შორის“  პოლონეთის საგარეო საქმეთა სამინისტროს ხელშეწყობით და ქ. ლუბლინის მერიის ორგანიზებით იმართება. სემინარის  ფარგლებში, აღმოსავლეთ პარტნიორობის და ადგილობრივი თვითმმართველობების თანამშრომლობის საკითხებზე იმსჯელებენ.
გიორგი სოლომონია   სიტყვით 3 ოქტომბერს გამოვა. თბილისის მერის მოადგილე მიმოიხილავს ევროკავშირთან  აღმოსავლეთ ქვეყნების  ინტეგრაციის  საკითხებს და ისაუბრებს ამ მიმართულებით არსებულ პრობლემებზე და პერსპექტივებზე.
დისკუსიებში მონაწილეობას მიიღებენ ევროპარლამეტის დეპუტატები და არასამთავრობო ორგანიზაციების ექსპერტები აღმოსავლეთ პარტნიორობის ქვეყნებიდან და პოლონეთიდან.
ვიზიტის ფარგლებში, თბილისის მერის მოადგილე და მერიის ადმინისტრაციის უფროსი კომპანია „ევოლუცია პოლანდ“-ის მიწვევით, 5 ოქტომბერს  ქ. ვარშავაში გაემგზავრებიან.  შეხვედრაზე „ევოლუცია პოლანდის“ ხელმძღვანელობა ქართველ სტუმრებს ქალაქის გარე განათების მიმართულებით საკუთარ  გამოცდილებას გაუზიარებს.

 

 

 

 

 

 

 

 

 

 

 

სიახლე
1 ოქტომბერი 2014  
 
 

თბილისის მერის მოადგილე, ალუდა გოგლიჩიძე საქართველოს ფეხბურთის ფედერაციის წარმომადგენლებს შეხვდა.შეხვედრაზე მხარეებმა 2015 წელს, თბილისში, უეფა-ს სუპერ თასის ფინალური მატჩის ჩატარების დეტალებზე იმსჯელეს.
თბილისის მერის მოადგილის ალუდა გოგლიჩიძის თქმით, ორსააათიან შეხვედრაზე პროექტის განხორციელების პროცესში შესაძლო რისკები და მათი მოგვარების გზები განიხილეს. მისივე თქმით, უეფა-ს სუპერ თასის ფინალური მატჩის ჩასატარებლად, სამუშაოების გარკვეული ნაწილი დაწყებულია და პროცესი გაგრძელდება.
საქართველოს ფეხბურთის ფედერაციის ვიცე-პრეზიდენტის, რევაზ არველაძის განცხადებით, შეხვედრაზე მხარეებმა გამოთქვეს მზაობა, რომ უეფა-ს სუპერ თასის ფინალური მატჩი მაღალ დონეზე ჩატარდეს.

 

 

 

 

 

 

 

 

 

 

 

 

 

სიახლე
1 ოქტომბერი 2014  
 
 

თბილისის საკრებულოში, ურბანული დაგეგმარებისა და საქალაქო მეურნეობის კომისიის სხდომა გაიმართა, სადაც „სინათლის ქალაქის“ ხელმძღვანელს ვასილ ხორავას მოუსმინეს. ვასილ ხორავამ საკრებულოს წევრებს ამ თანამდებობაზე მის დანიშნვამდე არსებული ვითარება გააცნო და ვრცლად ისაუბრა სამომავლო პროექტებზე. შეხვედრა კითხვა-პასუხის რეჟიმში წარიმართა.
ურბანული დაგეგმარებისა და საქალაქო მეურნეობის კომისიის დრევანდელ სხდომას თბილისის მერის მოადგილე გიორგი სოლომონია დაესწრო.

 

სიახლე
30 სექტემბერი 2014  
 
 

თბილისის მერიისა და საქართველოს კულტურისა და ძეგლთა დაცვის სამინისტროს მხარდაჭერით, 1-5 ოქტომბერს "Tbilisi Photo Festival 2014" გაიმართება. ფესტივალთან დაკავშირებით დღეს მწერალთა სახლში ფესტივალის ორგანიზატორებმა და მხარდამჭერებმა პრესკონფერენცია გამართეს.
როგორც თბილისის მერიის ადმინისტრაციის უფროსმა რევაზ ჩახავამ განაცხადა, მერია აქტიურად უჭერს მხარს ფესტივალს, როგორც დედაქალაქის კულტურული ცხოვრების განუყოფელ ნაწილს. მისი თქმით, ფესტივალის ფარგლებში, ახალგაზრდა ფოტოხელოვანებს მიეცემათ შესაძლებლობა, საკუთარი  ნამუშევრები გააცნონ მსოფლიოში აღიარებულ ფოტოგრაფებს. მისივე თქმით, მერია ფესტივალის მხარდაჭერას მომავალშიც გააგრძელებს.
როგორც პრესკონფერენციაზე აღინიშნა, ფესტივალი წელს საიუბილეო, მეხუთე წელს აღნიშნავს და წლევანდელი პროგრამა ფოტოგრაფიის მოყვარულებისთვის განსაკუთრებით საინტერესო იქნება.
"Tbilisi Photo Festival 2014" 1 ოქტომბერს, 18:00 საათზე, აბანოთუბანში, ლეღვთახევში უკრაინის კონფლიქტის თემატიკაზე შექმნილი ფოტოგამოფენით გახსნება. ფესტივალის ფარგლებში, „თი-ბი-სი გალერეაში“ მოეწყობა კიდევ ერთი მასშტაბური გამოფენა - "ქართული დღიურები. რობერტ კაპა საქართველოში 1947". ასევე წარმოდგენილი იქნება რეზო კეზელის, ბორის შავერდიანისა და დევიდე მონტელეონეს ფოტოპროექტები. ფესტივალის ფარგლებში გაიმართება ფოტოგრაფიის ღამე - ფოტოჩვენებები ძველ თბილისში ღია ცის ქვეშ.
"Tbilisi Photo Festival 2014"-ის პარტნიორები და მხარდამჭერები არიან თბილისის მერია და საქართველოს კულტურისა და ძეგლთა დაცვის სამინიტრო.

 

 

სიახლე
30 სექტემბერი 2014  
 
 

საქართველოს მთავრობა დაეთანხმა თბილისის მერიას, რათა მან შპს „სი-თი პარკთან“ გაფორმებული ხელშეკრულების ფინანსური და სამართლებრივი ანალიზის ჩატარების მიზნით, საერთაშორისო აუდიტორული კომპანია გამარტივებული შესყიდვის საფუძველზე შეარჩიოს. საკითხი მთავრობის დღევანდელ სხდომაზე თბილისის ვიცე-მერმა, ალექსანდრე მარგიშვილმა წარადგინა.
„საქართველოს მთავრომამ მხარი დაუჭირა თბილისის მერის, დავით ნარმანიას ინიციატივას, ჩატარდეს მერიის ყოფილი ხელმძღვანელობის მიერ შპს „სი-თი პარკთან“ გაფორმებული ხელშეკრულების სამართლებრივი და ფინანსური ასპექტების კომპლექსური ანალიზი.  ვფიქრობთ, საკმაოდ შეზღუდულ ვადებში მივიღებთ კომპეტენტურ დასკვნას, რომელზეც კონტრაქტორი ვერ იტყვის, რომ ეს არის ცალსახად მხოლოდ თბილისის მერიის დღევანდელი ხელმძღვანელობის პოზიცია, არამედ იქნება ობიექტური, გარედან დანახული და აღწერილი რეალობა“, - განაცხადა ალექსანდრე მარგიშვილმა.
მისივე თქმით, თბილისის მთავრობა ელოდება პასუხებს კითხვებზე, თუ რამდენად კანონიერად და თბილისელების ინტერესების დაცვით გაფორმდა თავის დროზე ხელშეკრულება „სი-თი პარკთან“,  რამდენად სამართლიანი იყო ის, რომ თბილისელებისთვის არ უკითხავთ 25-დან 50 ლარამდე პარკინგის საფასურის გაზრდა და ბევრი ის ცვლილება, რომელიც წლების განმავლობაში განხორციელდა.
ალექსანდრე მარგიშვილის თქმით, შემოწმების შედეგად ხელშეკრულება ვერ გაუქმდება. „ანალიზი და აუდიტის შედეგები  გვაჩვენებს, რამდენად მიზანშეწონილი იქნება ხელშეკრულების ამჟამად არსებული  პირობების შენარჩუნება. წინასწარ შემიძლია გითხრათ, რომ ჩვენ არ ვეთანხმებით ამ პირობებით ურთიერთობის გაგრძელებას. ყველაზე რეალისტური იქნება, რომ ხელშეკრულებაში სერიოზული ცვლილებები შევიდეს“, - განაცხადა თბილისის ვიცე-მერმა.

 

 

 

სიახლე
30 სექტემბერი 2014  
 
 

თბილსის მერი დავით ნარმანია სამუშაო ვიზიტით გერმანიაში გაემგზავრა. ვიზიტის ფარგლებში დავით ნარმანია ბერლინის მერს შეხვდება. შეხვედრა გაცნობითი ხასიათის იქნება. ორი დედაქალაქის მერი თბილისსა და ბერლინს შორის სხვადასხვა სფეროში ურთიერთობების გაღმავების საკითხებს განიხილავენ.
„ბერლინის მერთან საუბარი თბილისსა და ბერლინს შორის თანამშრომლობის საკითხების გაღრმავებაზე გვექნება და მუნიციპალური ინფრასტრუქტურის გაუმჯობესების, ევროპული სტანდარტების ჰარმონიზაციისა და სხვა ცალკეულ პროექტებში მხარდაჭერის საკითხებზე ვისაუბრებთ“, - განაცხადა გერმანიაში გამგზავრების წინ დავით ნარმანიამ.
მისივე თქმით, თბილსიის ხელისუფლებამ დედაქალაქის გენერალური გეგმის შემუშავებასთან დაკავშირებით გერმანიასთან აქტიური თანამშრომლობა დაიწყო. „გენგეგმის შედგენისას გერმანული მხარე მხარდაჭერას გაგვიწევს და ამ მხრივ ევროპული გამოცდილების გაზიარებაში დაგვეხმარება. გერმანელი ექსპერტები უშუალოდ იქნებიან ჩართულები ამ პორცესში და გაგვიწევენ ყველა საჭირო კონსულტაციას იმისათვის, რომ შედგეს ძალიან ღირებული და განვითარებაზე ორიენტირებული დედაქალაქის განვითარების გრძელვადიანი გეგმა“, - განაცხადა დავით ნარმანიამ.
მისივე თქმით, მას შემდეგ, რაც საქართველომ ასოცირების შეთანხმებას მოაწერა ხელი, განსაკუთრებით აქტუალურია არსებული წესებისა და პროცედურების ევროპული გამოცდილებასთან ჰარმონიზაცია. ამიტომაც მუნიციპალური საკითხების გადაწყვეტისას თბილისის მთავრობა გერმანულ გამოცდილებას აუცილებლად გამოიყენებს.
ბერლინის მერთან თბილისის მერის შეხვედრა 30 სექტემბერს გაიმართება.

 

 

 

 

 

 

 

 

 

 

 

 

 

 

 

 

 

 

სიახლე
28 სექტემბერი 2014  
 
 

2014 წლის 29 სექტემბერს საქართველოს ფეხბურთის ფედერაციის პრეზიდენტმა გაავრცელა ინფორმაცია, თითქოს 2015 წლის 11 აგვისტოს თბილისში უეფას სუპერ თასის ფინალური მატჩის ჩატარება, თბილისის მერიის დაუდევრობის გამო, შესაძლოა, ჩავარდეს. მკაფიოდ გვინდა განვაცხადოთ, რომ თბილისის მერია, თავისი კომპეტენციის ფარგლებში, მაქსიმალურად ჩაერთო სუპერ თასის ფინალური მატჩის საორგანიზაციო საკითხებში, თუმცა, აქვე ვაცხადებთ, რომ ხელშეკრულება, რომელზეც მერიას უნდა მოეწერა ხელი, ფეხბურთის ფედერაციას ამ დრომდე არ მოუმზადებია.
კარგი იქნებოდა, თუკი ფეხბურთის ფედერაციას გაცილებით საქმიანი მიდგომა ექნებოდა აღნიშნული ღონისძიების ჩატარებასთან დაკავშირებით. დღემდე არც ერთ ოფიციალურ დოკუმენტში, რომელიც უეფას სუპერ თასის ფინალური მატჩის საორგანიზაციო საკითხებს განსაზღვრავს, თბილისის მერია არ ფიგურირებს. მნიშვნელოვანია ისიც, რომ უეფასთან ხელშეკრულებას ხელს აწერს არა თბილისის მერია, არამედ ფეხბურთის ფედერაცია, რომელსაც, თავის მხრივ, ხელშეკრულება უნდა გაეფორმებინა თბილისის მერიასთან, თბილისის საერთაშორისო აეროპორტთან და სტადიონთან. თუმცა, სფფ–ს თბილისის მერიისთვის აღნიშნული დოკუმენტი ამ დრომდე არ შემოუთავაზებია.
ფაქტია ისიც, რომ თბილისის მერიის 2014 წლის ბიუჯეტში აღნიშნული ღონისძიების საორგანიზაციო საკითხებზე თანხა გათვალისწინებული არ იყო და მხოლოდ აგვისტოს ბოლოს, ბიუჯეტის კორექტირების შემდეგ გახდა შესაძლებელი სამუშაოების ჩასატარებლად საჭირო თანხების გამოყოფა.
2014 წლის 26 აგვისტოს თბილისის მერიის სოციალური მომსახურებისა და კულტურის საქალაქო სამსახურში საქართველოს ფეხბურთის ფედერაციისგან შემოვიდა წერილი, რომლითაც ის ითხოვდა 2015 წლის 11 აგვისტოს თბილისში უეფას სუპერ თასის მასპინძლობასთან დაკავშირებით, მატჩის მასპინძელ - ბორის პაიჭაძის  სახელობის ეროვნულ სტადიონზე ჩასატარებელი სამუშაოების ფარგლებში, ბილეთების ელექტრონული სისტემისა და მასთან პირდაპირ და პერიფერიულად დაკავშირებული ტექნიკის მონტაჟისთვის 2014 წლის ბიუჯეტში თანხების გამოყოფის თაობაზე.
თბილისის მერიის სოციალური მომსახურებისა და კულტურის საქალაქო სამსახურის მოთხოვნის შესაბამისად, მერიის საფინანსო სამსახურმა მოამზადა თბილისის 2014 წლის ბიუჯეტის ცვლილებების პროექტი, რომელიც თბილისის საკრებულოს 2014 წლის 16 სექტემბრის N8-14 დადგენილების საფუძველზე დამტკიცდა და ბიუჯეტში დაემატა "ბორის პაიჭაძის სახელობის ეროვნული სტადიონის განვითრების" ქვეპროგრამა საერთო თანხით - 4,2 მილიონი ლარი. ღონისძიების საორგანიზაციო საკითხებისთვის საჭირო თანხები თბილისის 2015 წლის ბიუჯეტშიც არის დაგეგმილი და ჯამში, აღნიშნულ ღონისძიებაში ქ. თბილისის მერიის ფინანსური მონაწილეობა 13,2 მილიონი ლარით განისაზღვრება.
მიმდინარე წლის 15 სექტემბერს საქართველოს ფეხბურთის ფედერაციამ მოგვაწოდა უეფასთან დასადები ხელშეკრულების პროექტი, რომელსაც ხელი უნდა მოაწეროს უეფამ და ფეხბურთის ფედერაციამ. ამავდროულად, ფედერაციამ უნდა უზრუნველყოს მერიასთან ხელშეკრულების დადება, რომლის პროექტიც ფედერაციას ჯერ-ჯერობით არ მოუწოდებია. ამავე წერილით ფედერაცია მერიისაგან ითხოვს ჩვენი კომპეტენციის ფარგლებში მოცემული ინფორმაციის შევსებას, რაც ბუნდოვანია მოწოდებული ხელშეკრულების შენაარსის გათვალისწინებით. აღნიშნულ საკითხებზე მუშაობისას მოვიძიეთ ის დოკუმენტები, რომელიც ოფიციალურად განსაზღვრავს თბილისის მერიის მონაწილეობის საკითხებს 2015 წლის 11 აგვისტოს უეფას სუპერ თასის ფინალური მატჩის მასპინძლობასთან დაკავშირებულ პროექტში. აღმოჩნდა, რომ სოციალური უზრუნველყოფისა და კულტურის საქალაქო სამსახურის შესაბამის სპორტის განყოფილებაში ამ კუთხით არავითარი დოკუმენტი არ მოიძებნა.
აღნიშნული პრობლემების განსახილველად და მათი მოგვარების ოპტიმალური გზების დასახვის მიზნით, 2014 წლის 25 სექტემბერს ქ. თბილისის მერიაში მოწვეულ იქნა საკითხით დაინტერესებული ყველა მხარე. სამუშაო შეხვედრისას გაირკვა, რომ არ არსებობს პროექტი, სადაც გაწერილია ღონისძიების მოსამზადებელი კონკრეტული ქმედებები, პასუხისმგებელი პირების, შესრულების დროისა და საჭირო თანხების მითითებით. გაურკვეველია, არსებობს თუ არა აუდიტის დასკვნა სტადიონზე გასაწევი სამუშაოების აუცილებლობის შესახებ. არ არის ინფორმაცია ღონისძიებისთვის შესასყიდი ტექნიკის გარანტიისა და დაზღვევის ხარჯების შესახებ, შესაბამისად, გაურკვეველია, ვის ეკისრება პასუხისმგებლობა სატესტო თამაშის დროს ტექნიკის დაზიანების შემთხვევაში.
ყოველივე ზემოთ აღნიშნულის გათვალისწინებით, გადაწყდა, რომ: საკითხი დაჩქარებული წესით გავიდეს საქართველოს მთავრობის სხდომაზე და საქართველოს მთავრობის დადგენილებით მოხდეს თბილისის მერიის აღნიშნულ ღონისძიებაში ფინანსური მონაწილეობის ფორმალიზება. საქართველოს ფეხბურთის ფედერაცია წარუდგენს მის ხელთ არსებულ ყველა დოკუმენტს საკითხით დაინტერესებულ ყველა მხარეს. გაფორმდება ხელშეკრულება საკითხით დაინტერესებულ მხარეებსა და ქ. თბილისის მერიას შორის. საქართველოს ფეხბურთის ფედერაცია მოამზადებს პროექტს ღონისძიებისთვის გასაწევი სამუშაოების შესახებ, დროში გაწერილი, თანხებისა და პასუხისმგებელი პირების მითითებით. სს „ბორის პაიჭაძის სახელობის ეროვნული სტადიონი“ მოამზადებს განვითარების სტრატეგიულ გეგმას და გრძელვადიან პროგრამას, რის საფუძველზეც ბიუჯეტის  ქვეპუნქტი - "ბორის პაიჭაძის სახელობის ეროვნული სტადიონის განვითრების" ქვეპროგრამა გაიწერება სრულფასოვნად. საქართველოს ფეხბურთის ფედერაცია წარმოადგენს უეფას მიერ გამოგზავნილ სამოქმედო გეგმას, ახსნა-განმარტებით, თუ რა სამუშაოები შესრულდა, რა თანხები დაიხარჯა, ვინ იყო პასუხისმგებელი, ვინ გაწია ხარჯები და რა სამუშაოებია შესასრულებელი - დროის, პასუხისმგებელი პირის, თანხის მითითებით. საქართველოს ფეხბურთის ფედერაცია თბილისის მერიას წარუდგინს უეფას იმ მოთხოვნებს, რომელსაც უნდა აკმაყოფილებდეს სტადიონი. აღნიშნულზე დაყრდნობით, მომზადდება დასკვნა სტადიონზე გასაწევი სამუშაოების აუცილებლობის შესახებ და სხვა.
სამწუხაროდ, აღნიშნული შეთანხმების შემდეგ საკითხი წინ არ წაწეულა და საქართველოს ფეხბურთის ფედერაციას არ წარმოუდგენია ის ინფორმაცია და შესაბამისი დოკუმენტები, რისი წარმოდგენის ვალდებულებაც მან აიღო.
მიუხედავად არსებული გაუგებრობისა, თბილისის მერია კვლავაც მზად არის, კომპეტენციის ფარგლებში, აქტიურად ჩაერთოს უეფას სუპერ თასის ფინალური მატჩის საორგანიზაციო საკითხებში. აგრეთვე, მოვუწოდებთ ყველა მხარეს, ფუჭი და უსაგნო ბრალდებების ნაცვლად, ყველამ ვიკისროთ ჩვენი წილი პასუხისმგებლობა იმისათვის, რომ აღნიშნული ღონისძიება თბილისმა და მთლიანად საქართველომ ღირსეულად ჩაატაროს. 

 

სიახლე
30 სექტემბერი 2014  
 
 

მეტროსადგურში „ვაგზლის მოედანი - 2“, მამაკაცის გარდაცვალებით გამოწვეული საგამოძიებო მოქმედებების გამო, საბურთალოს ხაზი დროებით შეჩერებულია. ადგილზე მუშაობენ სამართალდამცველები, რის შემდეგაც დადგინდება მისი გარდაცვალების მიზეზი. ამ ეტაპზე არ გამოირიცხება თვითმკვლელობის ვერსია.
საბურთალოს ხაზის ფუნქციონირება საგამოძიებო მოქმედებების დასრულებისთანავე აღდგება.
აქვე, ბოდიშს ვუხდით მოსახლეობას გადაადგილების მხრივ შექმნილი პრობლემის გამო.

 

სიახლე
28 სექტემბერი 2014  
 
იხილეთ მეტი