01:31     18/09/2014   Tbilisi.gov.ge
   
სიახლეების გამოწერა
სიახლეების გამოსაწერად მიუთითეთ თქვენი ელ-ფოსტა.

 
 

თბილისის მერის, დავით ნარმანიას ინიციატივა თსუ მაღლივი კორპუსის მიმდებარედ ახალგაზრდული ცენტრის მშენებლობასთან დაკავშირებით არ გადაიხედება. ტერიტორია, რომელზეც მშენებლობაა დაგეგმილი, ეკონომიკის სამინისტროს ბალანსზეა. თბილისის მერია უკვე აწარმოებს მოლაპარაკებებს სამინისტროსთან, რათა დროულად მოხდეს აღნიშნული ქონების გადმოცემა. პარალელურად, უკვე დაწყებულია ახალგაზრდული ცენტრის პროექტირებისთვის საჭირო პროცედურები.
რაც შეეხება თსუ მაღლივ კორპუსთან მიმდინარე გაზ-გასამართი სადგურის მშენებლობას, მშენებლობის ნებართვა გაცემულია უსაფრთხოებისა და ყველანაირი ტექნიკური მოთხოვნის სრული დაცვით. ამასთან, გაზ-გასამართი სადგური არავითარ პრობლემას არ შეუქმნის სხვა ობიექტების ფუნქციონირებას, მათ შორის, არც თბილისის სახელმწიფო უნივერსიტეტს და არც ახალგაზრდული ცენტრის მშენებლობის პროექტს.

 

სიახლე
17 სექტემბერი 2014  
 
 

თბილისის მთავრობის დღევანდელი სხდომის გადაწყვეტილებით, დედაქალაქის 26 ბაგა-ბაღში ცენტრალური გათბობის უახლესი სისტემა დამონტაჟდება. ამისათვის თბილისის საბავშვო ბაგა-ბაღების მართვის სააგენტოს დედაქალაქის ბიუჯეტიდან 1 160 000 ლარი გამოეყოფა. სააგენტოს დირექტორის, თემურ თორდინავას  ვარაუდით, გათბობის სისტემის დამონტაჟება ნოემბრის ბოლომდე დასრულდება. მისივე თქმით, დანარჩენ ბაგა-ბაღებში გათბობის ალტერნატიული საშუალებები არსებობს.
დღევანდელ სხდომაზე თბილისის მთავრობამ, ასევე, 132-ე ბაგა-ბაღისთვის სტატუსის აღდგენის გადაწყვეტილება მიიღო. კიევის N2-ში მდებარე საბავშვო ბაღი თბილისის წინა მთავრობამ 6 წლის წინ ე.წ. „ბაღების ოპტიმიზაციის“ ფარგლებში დახურა, რის შემდეგაც აღნიშნულ შენობაში ერთიანი ნაციონალური მოძრაობის ჩუღურეთის რაიონული ორგანიზაცია ფუნქციონირებდა.
„ეს ბაღი თბილისის მერიამ ბაგა-ბაღების მართვის სააგენტოს უკვე დაუბრუნა. ამჟამად მიმდინარეობს სტატუსის აღდგენის პროცედურები, რის შემდეგაც სარემონტო სამუშოები დაიწყება. ბაგა-ბაღი ფუნქციონირებას მიმდინარე სასწავლო წლის მეორე სემესტრიდან დაიწყებს და ის 150-მდე ბავშვს მოემსახურება.  ბაგა-ბაღში 35-40 ადამიანი დასაქმდება. გარდა ამისა, 3000 ბავშვისთვის დამატებითი ფართი მოვიძიეთ“, - განაცხადა დავით ნარმანიამ და რაიონის გამგებლებს დამატებითი შენობების მოძიება დაავალა. 

სიახლე
17 სექტემბერი 2014  
 
 

19 სექტემბერს თბილისის მთავრობა გარე სარეკლამო მომსახურების კომპანია outdoor.ge-ს ხელმძღვანელობის ანგარიშს მოისმენს. მთავრობის დღევანდელ ხხდომაზე თბილისის მერმა დავით ნარმანიამ თბილისის რაიონულ გამგეობებს დაავალა, შეხვედრაზე წარმოადგინონ დეტალური ინფორმაცია ამ კუთხით არსებული პრობლემების  შესახებ, რათა ერთობლივად გამოინახოს მათი გადაჭრის გზები.
პარასკევის ტრადიციული შეხვედრების ფორმატში თბილისის მთავრობამ უკვე მოისმინა თბილისის სერვისის მიმწოდებელი კომპანების - „GWP, „სითი-პარკი“, „თელასი“, „ყაზტრანსგაზ-თბილისი“ და „თბილისის მიკროავტობუსის“ ხელმძღვანელების ანგარიშები გაწეული სამუშაოების შესახებ და სამომავლო გეგმებზე იმსჯელა.

სიახლე
17 სექტემბერი 2014  
 
 

ე.წ. ბოშების ბაზრობაზე 16 სექტემბერს გაჩენილი ხანძრის შედეგად მიმდებარე ეზოში მოსახლეობის საცხოვრებელი სახლების დაზიანებული სახურავების შესაკეთებლად დედაქალაქის მერია 18 150 ლარს გამოყოფს. როგორც  თბილისის მთავრობის დღევანდელ სხდომაზე დიდუბის რაიონის გამგებელმა ირმა ზავრადაშვილმა განაცხადა, თბილისის მერიას უკვე წარედგინა ოფიციალური  წერილი თანდართული ხარჯთაღრიცხვით, რომელიც დედაქალაქის მერის, დავით ნარმანიას დავალებით, დაჩქარებული წესით განსახილველად  თბილისის საკრებულოს გადაეგზავნება.
მისივე თქმით, ხანძრის შედეგად, ბაზრობის მიმდებარე ეზოში 300 კვადრატულ მეტრამდე   ფართობის სახურავია გამოსაცვლელი. უკვე დაწყებულია გაწმენდითი სამუშაოები.
რაც შეეხება ხანძრის შედეგად დაზარალებულ მოვაჭრეებს, დიდუბის რაიონის გამგებელი ადგილზე ვითარების გასაცნობად იმყოფება. დაზარალებულ მოვაჭრეებს ფულად კომპენსაციას ბაზრის ადმინისტრაცია გადაუხდის.

სიახლე
17 სექტემბერი 2014  
 
 

თბილისის მთავრობამ დღევანდელ სხდომაზე სოციალურად დაუცველი მრავალშვილიანი ოჯახებისთვის ერთჯერადი დახმარების თანხის ოდენობა გაზარდა. კერძოდ, სოციალურად დაუცველი მრავალშვილიანი ოჯახები, მესამე შვილის ყოლის შემთხვევაში, ნაცვლად 400 ლარისა, 800 ლარს, მეოთხე შვილის შემთხვევაში, 800 ლარის ნაცვლად 1000 ლარს, მეხუთე და შემდგომი შვილის შემთხვევაში 1000-ის ნაცვლად 1500 ლარს მიიღებენ. თბილისის მერის, დავით ნარმანიას თქმით, საბიუჯეტო ცვლილებებით მისი ერთ-ერთი  წინასაარჩევნო დაპირების შესრულების დაწყება შესაძლებელი გახდა.
მისივე თქმით, ბიუჯეტში დამატებით 8 მილიონი ლარია  გათვალისწინებული  იმისთვის, რომ რაიონულმა გამგეობებმა შეძლონ წლის ბოლომდე აუცილებელი სოციალური მომსახურეობის გაწევა. 2,5 მილიონი ლარით გაიზარდა თბილისის მერიის სოციალური მომსახურების სამსახურის დაფინანსება, რათა მან შეძლოს სხვა სახის სოციალური დახმარებების გაცემა. გარდა ამისა, უკვე გაიზარდა სასწრაფო დახმარების პერსონალის შრომის ანაზღაურება.
„ჩვენ დღეიდან უკვე შეგვიძლია ახალი ბიუჯეტით ვიმუშაოთ“ - განაცხადა მთავრობის დღევანდელ სხდომაზე თბილისის მერმა. დავით ნარმანია პოლიტიკური ოპონენტების მხრიდან ქამრების შემოჭერასთან დაკავშირებით გუშინ გაკეთებულ განცხადებასაც გამოეხმაურა.
„მინდა  ვუთხრა ჩვენს თანამოქალაქეებს, რადგან პოლიტიკური ოპონენტების მხრიდან გუშინ გაკეთდა განცხადება,  თითქოს  ქამრების შემოჭერით  სოციალური ან საინვესტიციო პროექტები შემცირდება. ქამრების მოჭერა არ ნიშნავს პროექტების და პროგრამების დაფინანსების შემცირებას, ეს ნიშნავს ადმინისტრაციული ხარჯების შემცირებას. ჩვენ იმიტომ გადავწყვიტეთ სესხის აღება და ეკონომიის ხარჯზე გავზარდეთ ბიუჯეტის ჯანდაცვის და  და სოციალური უზრუნველყოფის ნაწილი, რომ ხალხს არაფერი დააკლდეს.  სრული პასუხისმგებლობით ვაცხადებ, რომ არცერთი სოციალური მხარდაჭერა,  ჯანდაცვითი კუთხით არცერთი დაფინანსება არ შემცირდება და შეფერხდება,“ - განაცხადა დავით ნარმანიამ.

 

 

 

სიახლე
17 სექტემბერი 2014  
 
 

თბილისის საკრებულოს სხდომაზე დედაქალაქის 2014 წლის ბიუჯეტში ცვლილებების შეტანის საკითხზე იმსჯელეს. კენჭისყრის შემდეგ საკრებულომ მერიის ინიცირებული საბიუჯეტო ცვლილებები დაამტკიცა. საკრებულოს სხდომას თბილისის მერის მოადგილეები ალექსანდრე მარგიშვილი და გიორგი ხელაია, ასევე საქალაქო სამსახურების უფროსები ესწრებოდნენ.
თბილისის მერის მოადგილემ, გიორგი ხელაიამ დეპუტატებს 2014 წლის ბიუჯეტში შესატანი ცვლილებები დატალურად განუმარტა და დეპუტატების მიერ დასმულ ყველა შეკითხვას ამომწურავი პასუხი გასცა.
გიორგი ხელაიას თქმით, ახალ გუნდს მერიაში მიმდინარე წლის ბიუჯეტი დეფიციტური დახვდა, თანხების სოციალური ნაწილი, პრაქტიკულად, ათვისებული და ბინათმესაკუთრეთა ამხანაგობების ნაწილში ნულოვანი იყო. ამ ცვლილებებით თბილისის მთავრობა შეეცადა, რესურსები თანაბრად გადაენაწილებინა, რათა აღნიშნულ საკითხებში წლის ბოლომდე შესაძლებელი იყოს თბილისელების ინტერესების დაცვა.
საკრებულოს მიერ დამტკიცებული ცვლილებების მიხედვით, თბილისის ბიუჯეტი 772 000 000 ლარით განისაზღვრა.

სიახლე
16 სექტემბერი 2014  
 
 

თბილისის მერი დავით ნარმანია „ევროპის სახლში“  ჰოლანდიური დიზაინის ნიმუშების გამოფენას  დაესწრო. გამოფენაზე წარმოდგენილია  თანამედროვე არქიტექტურის, ინტერიერის და ავეჯის დიზაინის მინიატურული ნიმუშები.დავით ნარმანიას თქმით, არქიტექტურის და დიზაინი მუდმივად  ვითარდება, იხვეწება და უცხოური გამოცდილების გაზიარება მნიშვნელოვანია, რადგან მათში განსაკუთრებული შრომაა ჩადებული.  მისივე თქმით,  დედაქალაქის განვითარების ახალი გენერალური გეგმის შედგენისას, მნიშვნელოვანი იქნება  ჰოლანდიელ დიზაინერთა და არქიტექტორთა გამოცდილების გაზიარება. „მიმაჩნია, რომ განახლების პროცესი უნდა შეეხოს ყველა დარგს და მიმართულებას. შიდა–დიზაინის სფეროში ჩვენ უნდა ვიმუშაოთ ახალი ფორმების დანერგვაზე, რათა მყუდრო და სასიამოვნო გარემოს შესაქმნელად ბიზენსმენებს და მოქალაქეებს უახლეს მიღწევების გაცნობის შესაძლებლობა მივცეთ“ - განცხადა დავით ნარმანიამ. თბილისის მერმა იმედი გამოთქვა, რომ გამოფენა ხელს შეუწყობს ჰოლანდიელ პარტნიორებთან ბიზნეს–კავშირების განვითარებას. გამოფენის ორგანიზატორია „ევროპის სახლი“ და საქართველოში ნიდერლანდების საელჩო .

 

 

სიახლე
16 სექტემბერი 2014  
 
 

ე.წ. ბოშების ბაზრობაზე გაჩენილი ხანძრის შედეგად დაზარალებულ მოვაჭრეებს ფულად კომპენსაციას ბაზრის ადმინისტრაცია გადაუხდის, ხოლო მიმდებარე ეზოში დაზარალებულ ოჯახებზე დედაქალაქის მერია იზრუნებს. ამის შესახებ მოვაჭრეებს თბილისის მერმა დავით ნარმანიამ, ბაზრის  ადმინისტრაციასთან შეხვედრის შემდეგ განუცხადა. დავით ნარმანია პირადად ესაუბრა ბაზრის მფლობელი კომპანია „შოდა“-ს   საზღვარგარეთ მყოფ თანადამფუძნებელს, რომლისგანაც პირობა მიიღო, რომ დღესვე ჩატარდება დამფუძნებელთა სამეთვალყურეო საბჭო, რომელიც  დაზარალებული მოსახლეობისთვის ფულადი კომპენსაციის საკითხს გადაწყვეტს. „ ფულადი დახმარების  ოდენობა განისაზღვრება ინდივიდუალურად. მიღებული თანხით, დაზარალებულებს შეუძლიათ  დაფარონ ბანკის კრედიტი, ან იყიდონ საქონელი, რომლითაც ახალ ტერიტორიაზე განაგრძობენ საქმიანობას. ამის გარანტი კომპანიის ხელმძღვანელობაა მთელი მათი ქონებით. დაზარალებულებსა და კომპანიას შორის შუამავალი დიდუბის რაიონის გამგეობა იქნება“ - განაცხადა დავით ნარმანიამ.  თბილისის მერის თქმით,   კომპანიამ უკვე მიმართა ბანკს სესხისთვის, რომლის ნაწილი ფულად დახმარებაზე დაიხარჯება, ნაწილით კი მოეწყობა ახალი სავაჭრო ადგილები. თავის მხრივ, თბილისის მერია დაჩქარებული წესით გასცემს ნებართვას ახალი ინფრასტრუქტურის მოსაწყობად შესულ პროექტზე.

რაც შეეხება დაზარალებულ ოჯახებს და ბაზრის მიმდებარე ტერიტორიის დასუფთავებას, ამაზე  დიდუბის რაიონის გამგეობა და დასუფთავების სამსახური იზრუნებს. მოვაჭრეებთან შეხვედრის შემდეგ, დავით ნარმანია მიმდებარე ეზოში, ხანძრის შედეგად დაზარალებულ მოსახლეობას გაესაუბრა. მისი თქმით, სახლის სახურავების გადახურვა უახლოეს ხანებში დაიწყება. გარდა ამისა, თბილისის მერია და დიდუბის რაიონის გამგეობა სხვა სახის ზარალის ანაზღაურებაზეც იზრუნებს.

 

სიახლე
16 სექტემბერი 2014  
 
 

თბილისის მერიაში დღეს მოქალაქეთა მორიგი მიღება გაიმართა. თბილისის მერს, მერის მოადგილეებს, საქალაქო სამსახურის უფროსებსა და რაიონის გამგებლებს სხვადასხვა თემასთან დაკავშირებით 620 თბილისელი შეხვდა. თბილისის მერის დავით ნარმანიას ინიციატივით, მოქალაქეთა მიღება ყოველ ორშაბათს 14-დან 18 საათამდე მიმდინარეობს. მიღების წესის თანახმად, თბილისელებს შესაძლებლობა აქვთ, დედაქალაქის მთავრობის წევრებს შეხვდნენ და მათთვის მნიშვნელოვანი პრობლემატური საკითხები პირადად გააცნონ. 

სიახლე
15 სექტემბერი 2014  
 
 

თბილისის ვიცე-მერი ალექსანდრე მარგიშვილი სავაჭრო ცენტრ „თბილისი მოლში“ კაფე-მაღაზია „კოფი ბინის“ გახსნას დაესწრო. ალექსანდრე მარგიშვილის განცხადებით, მნიშვნელოვანია, რომ მსოფლიოში ცნობილი ყავის ბრენდი თბილისში შემოვიდა. თბილისის მერის პირველი მოადგილის განცხადებით, „კოფი ბინის“ მენეჯმენტი ქსელის გაფართოებას გეგმავს და უახლოეს მომავალში თბილისში ბრენდის 15 ფილიალი გაიხსნება.
„კოფი ბინი“ 1963 წელს ჰოლივუდში დაარსდა. როგორც კომპანიის მენეჯმენტში აცხადებენ, „კოფი ბინის“ კაფეებში მომხმარებელს ექსკლუზიური რეცეპტით დამზადებული ყავის დაგემოვნება შეუძლია. „კოფი ბინს“ მსოფლიო მასშტაბით 49 ფილიალი აქვს.

სიახლე
16 სექტემბერი 2014  
 
იხილეთ მეტი