თბილისში ოფიციალური ვიზიტით იმყოფება საარბრიუკენის დელეგაცია ქალაქის მერის, შარლოტე ბრიცის ხელმღვანელობით. დელეგაციის შემადგენლობაში არიან საარბრიუკენის საკრებულოს დეპუტატები, მერიის  ეკონომიკური განვითარების, დასაქმების, საზღვარგარეთთან თანამშრომლობისა და სერთაშორისო ურთიერთობების ჯგუფის ხელმძღვანელი, ასევე სახელმწიფო თეატრის დირექტორი. საარბრიუკენის დელეგაციის წარმომადგენლები თბილისის მერს გიგი უგულავასა და მერიის საქალაქო სამსახურების უფროსებს შეხვდნენ.  შეხვედრაზე მხარეებმა ორ დაძმობილებულ ქალაქს შორის ურთიერთობების შემდგომ გაღრმავებაზე, კულტურული კავშირების განმტკიცებასა და სხვადასხვა სფეროში გამოცდილების გაზიარებაზე ისაუბრეს. თბილისის მერთან შეხვედრის შემდეგ, დელეგაციის წარმომადგენლებმა მერიის მოქალაქეთა მომსახურების ცენტრი დაათვალიერეს და იქ დანერგილ სევრისებს გაეცნენ.

თბილისსა და საარბრიუკენს შორის დაძმობილების შესახებ, ხელშეკრულებას ხელი 1975 წლის 22 მარტს მოეწერა. მას შემდეგ ორ ქალაქს შორის ურთიერთობები წარმატებით ვითარდება. თანამშრომლობის არეალი მოიცავს კულტურის, ეკონომიკის, ტურიზმის, ქალაქის დაგეგმარებისა და გარემოს დაცვის სფეროებს. ბოლო პერიოდში განხორციელდა არაერთი ერთობლივი პროექტი როგორც ორმხრივი ურთიერთობების ფორმატში, ასევე გერმანიის საერთაშორისო თანამშრომლობის საზოგადოებასთან (GIZ) თანამშრომლობით.  GIZ -ის მხარდაჭერით, თბილისისა და საარბრიუკენის მერების აქტიური მონაწილეობით, სხვადასხვა სფეროში ყოველწლიურად ხორციელდება მნიშვნელოვანი პროექტები  ეკონომიკის მხარდაჭერის, მუნიციპალური მომსახურების გაუმჯობესების და  სხვა სფეროებში.

გიგი უგულავა: საარბრიუკენის და თბილისის მეგობრობა ძალიან ბევრ წელიწადს ითვლის, 1975 წელს მოეწერა  ჩვენ ქალაქებს შორის დამეგობრებას ხელი და ერთ ინტევიუში ვერ აღწერ და ვერ მოყვები რამდენი მიმართულებით განვითარდა ეს ურთიერთობა. ყველაზე მნიშვნელოვანი მაინც ჩემის აზრით 90–იან წლებში სტუდენტებისთვის ხელის შეწყობა იყო. ძალიან ბევრმა სტუდენტმა  მიიღო განათლება, მათ შორის მეც ვიყავი. სწორედ ამიტომ  საარბრიუკენი ჩემთვის ორმაგად მშობლიური ქალაქია. დღეს მთავარია ჩვენ ეს ურთიერთობები შევინარჩუნოთ და გავაძლიეროთ. 

გიგი უგულავა დღეს მერიის უსაფრთხოების სამსახურის იმ თანამშრომელს შეხვდა, რომელმაც საპატრულო პოლიციის თანამშრომლებთან ერთად, დიდუბის რაიონის გამგეობის შენობის წინ მომხდარი ინციდენტის თავიდან აცილება შეძლო. თბილისის მერმა უსაფრთხოების თანამშრომელს დაკისრებული მოვალეობის ეფექტურად შესრულებისთვის მადლობა გადაუხადა და წარმატებები უსურვა. ინციდენტი გუშინ გამგეობასთან მოხდა, როდესაც შენობის წინ შეიარაღებული პიროვნება დაფიქსირდა, რომელსაც ხელში საეჭვო ნივთები ეჭირა. ადგილზე მივიდა საპატრულო პოლიცია, რომლებმაც მერიის უსაფრთხოების სამსახურის თანამშრომელთან ერთად, აღნიშნული პიროვნებისთვის იარაღის ჩამორთმევა და მისი დაკავება შეძლეს. 
დაკავებამდე შეიარაღებულმა პირმა ორი გასროლა განახორციელა, რასაც მსხვერპლი არ მოჰყოლია. გამოძახებული იყო ასევე გამნაღმველთა ჯგუფი და დადგინდა, რომ დაკავებულის კუთვნილ პოლიეთილენის პარკში ასაფეთქებელი ნივთიერება არ არსებობდა. 
დაკავებული პირი გადაყვანილ იქნა საგამოძიებო უწყებაში და მიმდინარეობს საქმის გამოძიება. არსებული ინფორმაციით, აღნიშნული პიროვნება მიმდინარე წელს ამნისტიის შედეგად გათავისუფლდა.

თბილისის განვითარების გენერალურ გეგმაში არსებულ გარემოსდაცვით გადაწყვეტილებებს შორის, უმთავრესია მსხვილი გამწვანებული და რეკრეაციული სისტემის ჩამოყალიბება. გამწვანების პროგრამის ფარგლებში, ქალაქის მასშტაბით ჩატარებული სკვერების რეკონსტრუქციის შემდეგ, თბილისის მერია გამწვანების ახალ მასშტაბურ პროექტებზე იწყებს მუშაობას.მიმდინარე პროექტებს შორის მნიშვნელოვანის ვაკის პარკის რეაბილიტაციის პროექტი, რომელიც 2013 წელს თბილისის უძველესი რეკრეაციული კომპლექსის აღდგენასა და თანამედროვე სტანდარტების შესაბამისად მოწყობას ითვალისწინებს. 

პროექტის მიხედვით, პარკი გასართობ, სპორტულ და საბავშვო ზონებად დაიყოფა. პარკის ტერიტორიაზე მრავალფუნქციური საზოგადოებრივი, გასართობი თუ სპორტული ინფრასტრუქტურა, სამკითხველოები, საპიკნიკეები, საჩრდილობლები, სპორტული (ჩოგბურთის, მინიფეხბურთის, კალათბურთის)   მოედნები, საველოსიპედე ბილიკები მოეწყობა, აღდგება შადრევანი,  რაც სრულყოფილი დასვენებისა და გართობის შესაძლებლობას მისცემს ყველა ასაკის ადამიანს. პროექტის კონცეფციის ძირითადი იდეა არის ის, რომ ბავშვებს, ახალგაზრდებსა  თუ ასაკოვან დამსვენებლებს საშუალება ექნებათ ითამაშონ, დაკავდნენ სპორტით, დაისვენონ, წაიკითხონ, დაისვენონ ბალახზე, დატკბნენ ბუნებითა და სიმშვიდით. რეაბილიტირებული პარკი მაქსიმალურად დატვირთული იქნება სივრცითა და კომფორტული ლანდშაფტით. ვაკის პარკი კვლავ გახდება თბილისის  ერთ-ერთი ყველაზე სასიამოვნო, სრულყოფილ  და უსაფრთხო დასასვენებელი ზონა.

ვაკის პარკში დაგეგმილ სამუშაოებსა და რეაბილიტაციის პროექტზე დღეს, ვაკის რაიონის გამგებელმა ბაჩო დოლიძემ და ეკოლოგიისა და გამწვანების საქალაქო სამსახურის უფროსმა გიორგი ქორქაშვილმა ისაუბრეს.

თბილისის ეთნოგრაფიულ მუზეუმში ღვინის კლუბის ორგანიზებით, ახალი ღვინის ფესტივალი გაიმართება. ფესტივალში მონაწილეობას თითქმის ყველა მსხვილი ღვინის მწარმოებელი კომპანია და მცირე მარანი მიიღებს. საქართველოს სხვადასხვა რეგიონიდან წარმოდგენილი იქნება ასევე ოჯახური ღვინოები. ახალი ღვინის ფესტივალების ტრადიცია მეღვინეობით სახელგანთქმულ ყველა ქვეყანაში არსებობს. საქართველოში კი, ღვინის კლუბის ინიციატივით, ფესტივალი პირველად 2010 წელს ჩატარდა და ათასობით ღვინის გურმანს უმასპინძლა, მათ შორის, სხვადასხვა ქვეყნიდან ჩამოსულ უცხოელ ტურისტსა თუ ღვინის სპეციალისტს. მას შემდეგ ტრადიციად დამკვიდრდა, რომ მაისის ყოველ მეორე შაბათს ახალი ღვინის ფესტივალი გაიმართებოდა. ჯიშური მრავალფეროვნების გარდა წლევანდელი ფესტივალი ქვევრის ღვინისა და იშვიათი ჯიშებიდან დაყენებული ღვინოების სიუხვით იქნება გამორჩეული. ფესტივალის ერთ-ერთი მთავარი შემეცნებით-გასართობი სანახაობა იქნება ჭურის მოხდა და ჭაშნიკი ეთნოგრაფიული მუზეუმის ერთ-ერთ ეზოში. ახალი ღვინის ფესტივალს თბილისის მერი გიგი უგულავა დაესწრო.

დღეს თბილისის ახალ სავაჭრო გალერეაში ,,რუსთაველის 42“ მსოფლიოში ცნობილი ბრენდის "ZARA" კიდევ ერთი ოფიციალური მაღაზია გაიხსნა. სავაჭრო გალერეა 4 სართულიანი მრავალფუნქციური კომპლექსის ნაწილს წარმოადგენს, სადაც ოცდაათამდე საერთაშორისო ბრენდი განთავსდება. "ZARA"-ს ახალი მაღაზიის გახსნას თბილისის მერი გიგი უგულავა და AlHokairჯგუფის, Inditex-ის საუდის არაბეთის, შუა აზიისა და კავკასიის რეგიონის აღმასრულებელი დირექტორი, დოქტორი იასინ სიბარი და სხვა მოწვეული სტუმრები დაესწრნენ.

დღეისათვის "ZARA"–ს ბრენდი მსოფლიოს 78 ქვეყანაშია წარმოდგენილი. საქართველოში "ZARA"-ს პირველი მაღაზია ერთი წლის წინ, თბილისი მოლში გაიხნა. დღეიდან კი ქართველ მომხმარებელს საშუალება ექნება მსოფლიო ბრენდის ხარისხიანი პროდუქცია კიდევ ერთ ოფიციალურ მაღაზიაში შეიძინოს. "ZARA"-ს ახალ მაღაზიაში 100 ადამიანი დასაქმდა.

თბილისის მერიის პროექტ „თბილისელების ადვოკატის“ გასული წლის ანგარიში წარმოადგინა დღეს თბილისის ვიცე-მერმა სევდია უგრეხელიძემ. "თბილისელების ადვოკატი" დედაქალაქის მოსახლეობას  უფასო იურიდიული დახმარებას უკვე წლების სთავაზობს. პროექტის ფარგლებში, კვალიფიციური იურისტების მიერ, უფასო  იურიდიული დახმარება რამდენიმე ათასმა მოქალაქემ უკვე მიიღო. პროექტი მიმდინარე წელსაც გრძელდება.

ევროპის დღე ევროკავშირის წევრ და მისი წევრობის მსურველ ქვეყნებში ყოველწლიურად აღინიშნება. თბილისის მერია ევროპის დღეს სხვადასხვა კულტურული და საგანმანათლებლო ღონისძიებით აღნიშნავს. დღეს ევროპის დღესთან დაკავშირებით, ჯანსულ კახიძის სახელობის ბაღში საერთაშორისო ორგანიზაციების, საქართველოში აკრედიტებული დიპლომატიური წარმომადგენლებისა და ეროვნული უმცირესობებისთვის, თბილისის მერის მიღება და ქართველი მომღერლების კონცერტი გაიმართა. ღონისძიების ფარგლებში, ევროპული ქალაქების თემაზე გურამ წიბახაშვილის, იური მეჩითოვისა და ნესტან მამაცაშვილის ნამუშევრების ფოტო-გამოფენა მოეწყო.