ცხელი ხაზი 272 22 22
14:16 27/01/2015
გამოიწერეთ სიახლეები ელ. ფოსტაზე
 

გადაუდებელი დახმარების ოპერატიული მართვის ცენტრში, თბილისის მერიის ტრანსპორტის საქალაქო სამსახურისა და საქართველოს შინაგან საქმეთა სამინისტროს 112–ის დეპარტამენტის ანალიტიკური სამსახურის წარმომადგენლებმა ე.წ "ჭკვიანი შუქნიშნების" მოწყობის თემაზე პრეზენტაცია გამართეს და საკრებულოს დეპუტატებს სატრანსპორტო პრობლემების აღმოფხვრის მიზნით განსახორციელებელი პროექტები წარუდგინეს.
გადაუდებელი დახმარების ოპერატიული მართვის ცენტრის მიერ წარმოდგენილ პრეზენტაციაში, 112–ის მისიის, სტატისტიკის, ახალი სერვისებისა და სამომავლო გეგმების შესახებ იყო საუბარი. ცენტრის წარმომადგენელთა განცხადებით, ქართველი პროგრამისტების მიერ შემუშავებულ იქნა სპეციალური ელექტრონული სისტემა–ERC 112, რომელიც მაღალტექნოლოგიური ცენტრის მისიისა და ძირითადი ფუნქციების ეფექტიანი შესრულების გარანტიაა.
თბილისის მერიის ტრანსპორტის საქალაქო სამსახურის წარმოდგენილი პრეზენტაცია კი, საგზაო ქსელის გამტარუნარიანობისა და გზებზე უსაფრთხოების გაუმჯობესებას, ე.წ "ჭკვიანი შუქნიშნების" სისტემაში მოყვანას და სხვა მნიშვნელოვან საკითხებს ეხებოდა.
ტრანსპორტის საქალაქო სამსახურის უფროსის პაატა ჯაჭვლიანის თქმით, თბილისის მერია საცობების პრობლემის მოგვარების საკითხზე აქტიურად მუშაობს, ასევე ქალაქის მასშტაბით გრძელდება "ჭკვიანი შუქნიშნების" მონტაჟი.

 

სიახლე
26 იანვარი 2015  
 
 

საქართველოს სახალხო არტისტის ოთარ მეღვინეთუხუცესის 83 წლისთავზე, დღეს 9 აპრილის ბაღში ცნობილი მსახიობის ძეგლი საზეიმოდ გაიხსნა. ძეგლის ავტორი, მოქანდაკე ლევან ვარდოსანიძეა. ოთარ მეღვინეთუხუცესის ძეგლი თბილისის მერმა დავით ნარმანიამ, საქართველოს კულტურისა და ძეგლთა დაცვის მინისტრმა მიხეილ გიორგაძემ და  საკრებულოს თავმჯდომარე გიორგი ალიბეგაშვილმა გახსნეს. 9 აპრილის ბაღში ოთარ მეღვინეთუხუცესის ოჯახის წევრები, მეგობრები, კულტურისა და ხელოვნების სფეროს წარმომადგენლები შეიკრიბნენ.
„დღეს ღირსეული პატივი მივაგეთ ბატონ ოთარ მეღვინეთუხუცესს. ადამიანს, რომელმაც ძალიან დიდი შემოქმედება და მემკვიდრეობა დაგვიტოვა. რამდენიმე თვის წინ, როდესაც მისი სახელობის მემორიალური დაფა გავხსენით, პირობა დავდეთ, რომ 83 წლის იუბილეზე, 9 აპრილის ბაღს ოთარ მეღვინეთუხუცესის ძეგლი დაამშვენებდა და ამით პატივს მივაგებდით მის უკვდავ სახელს, რაც შევასრულეთ. ოთარ მეღვინეთუხუცესის სახელი შთამომავლობას შემორჩება, როგორც ნათელი მაგალითი ჭეშმარიტი ხელოვანისა, ღირსეული ქართველისა და სამაგალითო მოქალაქისა. თითოეული ჩვენგანის ვალია, მოკრძალებული წვლილი შევიტანოთ მისი სახელის უკვდავყოფაში, ჩვენი შვილები მოვიყვანოთ ამ ადგილზე და მოვუყვეთ მისი ღვაწლისა და შემოქმედების შესახებ,“ - განაცხადა დავით ნარმანიამ. თბილისის მერის თქმით, დედაქალაქის მერია ყოველთვის მზად არის, მხარში დაუდგეს ოთარ მეღვინეთუხუცესის ოჯახს.
კულტურისა და ძეგლთა დაცვის მინისტრის მიხეილ გიორგაძის თქმით, ოთარ მეღვინეთუხუცესმა მოღვაწეობის 60 წლის განმავლობაში არაერთი ძალიან მნიშვნელოვანი გმირი შექმნა კინოსა და თეატრში. „მქონდა ბედნიერება, პირადად ვიცნობდი ბატონ ოთარს. მინდა ხაზი გავუსვა, რომ მიუხედავად უდიდესი საერთაშორისო აღიარებისა, მას ყოველთვის თავმდაბლობა ახასიათებდა და ეს მტკიცე ხასიათი ყველა გმირს ლაიტმოტივად გაჰყვებოდა. ყველაზე მთავარი, რაც მას ჰქონდა და  დღესაც აქვს, უამრავი ჯილდოს და აღიარების გარდა, არის ხალხის სიყვარული, რისი დასტურიც დღევანდელი დღეა“, - განაცხადა მიხეილ გიორგაძემ.
ოთარ მეღვინეთუხუცესი 2013 წლის 9 მაისს 81 წლის ასაკში გარდაიცვალა. საქართველოს სახალხო არტისტს კინოსა და თეატრში რამდენიმე ათეული როლი აქვს შესრულებული. ოთარ მეღვინეთუხუცესს მინიჭებული აქვს რუსთაველის სახელობისა და საქართველოს სახელმწიფო პრემიები. 1979 წელს მიენიჭა საბჭოთა კავშირის სახალხო არტისტის წოდება. მსახიობი ასევე იყო არაერთი საერთაშორისო კონკურსის ლაურეატი.
ოთარ მეღვინეთუხუცესი დიდუბის პანთეონშია დაკრძალული. გარდაცვალების შემდეგ, თბილისის მერიის გადაწყვეტილებით, დედაქალაქში დიმიტრი უზნაძისა და რომის ქუჩებს შორის მდებარე მოედანს ოთარ მეღვინეთუხუცესის სახელი ეწოდა. მსახიობის სახლთან კი მემორიალური დაფა გაიხსნა. 

სიახლე
16 იანვარი 2015  
 
 

საქართველოში ოფიციალური ვიზიტით მყოფ ლიტვის პრემიერ-მინისტრ ალგირდას ბუტკევიჩუსს და ლიტვის დელეგაციის წევრებს თბილისის მერის მოადგილემ ნინა ხატისკაცმა ტურიზმის ეროვნული ადმინისტრაციის ხელმძღვანელ გიორგი ჩოგოვაძესთან ერთად, ძველ თბილისში უმასპინძლა.
თბილისის მერის მოადგილემ  პრემიერ-მინისტრს მიმდინარე და განსახორციელებელი პროექტები გააცნო.

 

სიახლე
26 იანვარი 2015  
 
 

ქალაქ თბილისის მუნიციპალიტეტის საკრებულოს დადგენილებით, დაწესებულებები, ორგანიზაციები, ინდივიდუალურ მეწარმეები, ფიზიკური და იურიდიული პირები, რომლებსაც 2014 წლის 22 სექტემბრიდან 12 დეკემბრამდე  დაერიცხათ დასუფთავების  მოსაკრებელი, გათავისუფლებული არიან ერთჯერადად დარიცხული გადასახადისგან, ხოლო მათ ვისაც უკვე გადახდილი აქვს მოსაკრებელი, გადახდილი თანხა დაუჯდებათ კრედიტში.
შპს „თბილსერვის ჯგუფი“ მიმართავს იმ აბონენტებს, რომლებსაც ზემოთ აღნიშნულ პერიოდში დაერიცხათ მოსაკრებელი, მიმდინარე წლის 5 ივნისის ჩათვლით, განცხადებით მიმართონ შპს „თბილსერვის ჯგუფს“ მისამართზე - კახეთის გზატკეცილი #67, ბელიაშვილის ქ.25.
თბილისის მუნიციპალიტეტის დასახლებული ტერიტორიის დასუფთავების მოსაკრებლის დარიცხვა-ამოღების კონტროლის მიზნით,  შპს „თბილსერვის ჯგუფმა“ 2014 წლის 22 სექტემბრის #02748 ბრძანებით  ქ. თბილისის პასპორტიზაციის ფარგლებში შეამოწმა დედაქალაქის 5 რაიონში მოქმედი დაწესებულებები, ორგანიზაციები, ფიზიკური და იურიდიულ პირები, ასევე ინდივიდუალური მეწარმეები.
აღნიშნულ პირებს  დასუფთავების მოსაკრებელი დაერიცხათ თბილისის საკრებულოს 2013 წლის 31 მაისის #7-22 გადაწყვეტილებით დადგენილი წესით, რამაც ხშირ შემთხვევაში შეადგინა 2 თვიდან 18 თვემდე პერიოდი. შესაბამისად, ერთჯერადად დარიცხული მოსაკრებლის ოდენობა მერყეობს დაახლოებით 100 ლარიდან 200 000 ლარამდე.
თბილისის მუნიციპალიტეტის საკრებულოს 2014 წლის 12 დეკემბრის #17-46 დადგენილებით, ძალადაკარგულად გამოცხადდა  2013 წლის 31 მაისის გადაწყვეტილება, რის გამოც შესამოწმებლად დარჩენილ რაიონებში მოქმედ დაწესებულებებს, ორგანიზაციებს, ფიზიკურ და იურიდიულ პირებს, ინდივიდუალურ  მეწარმეებს,   დასახლებული ტერიტორიის დასუფთავების მოსაკრებელი დაერიცხებათ მომსახურების მიღების მთელს პერიოდზე, მაგრამ არაუმეტეს ახალი დადგენილების მიღების ძალაში შესვლის დღიდან - 2014 წლის 17 დეკემბრიდან.
არსებული სიტუაციიდან გამომდინარე, დღემდე შემოწმებული ობიექტები აღმოჩნდნენ საკმაოდ მძიმე და არათანაბარ პირობებში, იმ პირებთან შედარებით, რომელთა შემოწმება განხორციელდება ქალაქ თბილისის მუნიციპალიტეტის საკრებულოს 2014 წლის 12 დეკემბრის #17-46 დადგენილების საფუძველზე.
ყოველივე ზემოაღნიშნულიდან გამომდინარე, ქ. თბილისის მუნიციპალიტეტში  მოქმედი დაწესებულებების, ორგანიზაციების, ფიზიკური და იურიდიულ პირების, ინდივიდუალური მეწარმეების თანაბარ პირობებში მოქცევის მიზნით, საჭიროა შემოწმებულ გადამხდელებზე (აბონენტებზე) ერთჯერედად დარიცხული დასახლებული ტერიტორიის დასუფთავების მოსაკრებლის დარიცხვის თარიღის კორექტირება.
დამატებითი ინფორმაციის მისაღებად დაუკავშირდით “თბილსერვის ჯგუფს” ცხელ ხაზზე: 2 61 90 50.
ქალაქ თბილისის მუნიციპალიტეტის საკრებულოს დადგენილება №20-83 იხილეთ ბმულზე: https://matsne.gov.ge/index.php?option=com_ldmssearch&view=docView&id=2669442&lang=ge#

 

 

 

 

სიახლე
14 იანვარი 2015  
 
 

ნაძალადევის რაიონში, 56-ე საბავშვო ბაგა-ბაღის გამაგრება-აღდგენითი სამუშაოები 2014 წლის დეკემბრის შუა რიცხვებიდან დაიწყო. ერთ-ერთი მნიშვნელოვანი გამოწვევა თბილისის საბავშვო ბაგა-ბაღების მართვის სააგენტოს ახალი ადმინისტრაციისთვის, სააღმზრდელო წლის დაწყების დროს  56-ე საბავშვო ბაგა-ბაღის თემა იყო, რადგან შენობა მესამე ხარისხის ავარიულობის აღმოჩნდა სამხარაულის ექსპერტიზის დასკვნის საფუძველზე და სააღმზრდელო პროცესის დაწყება, ფაქტობრივად, შეუძლებელი იყო. ამიტომ, სააგენტოს გადაწყვეტილებით, 56-ე საბავშვო ბაგა-ბაღის აღსაზრდელები ნაძალადევის რაიონის სხვადასხვა საბავშვო ბაგა-ბაღებში გადანაწილდნენ და დაიწყო შენობის გამაგრება-აღდგენითი სამუშაოები, რომელიც  2015 წლის ივნისისთვის დასრულდება. სარემონტო სამუშაოების დასრულების შემდეგ, ახალი სააღმზრდელო წლიდან,  საბავშვო ბაგა-ბაღს დაემატება ორი ახალი ჯგუფი, სადაც დამატებით 80-მდე და ჯამში 300-მდე აღსაზრდელი შეძლებს სააღმზრდელო პროცესის დაწყებას.
56-საბავშვო ბაგა-ბაღის სარეაბილიტაციო  სამუშაოები დღეს თბილისის მერის მოადგილემ, ალუდა გოგლიჩიძემ,  განათლების, სპორტისა და ახალგაზრდულ საქმეთა საქალაქო სამსახურის ხელმძღვანელმა გიორგი არეშიძემ, ნაძალადევის რაიონის გამგებელმა, ზაზა გაბუნიამ და საბავშვო ბაგა-ბაღების მართვის სააგენტოს ხელმძღვანელმა თემურ თორდინავამ მოინახულეს.
"ჩვენს ერთ-ერთი პრიორიტეტად კვლავ რჩება სკოლამდელი  განათლება.  აღსანიშნავია ისიც, რომ ეს არის პრობლემური  რაიონი  ბავშვების დარეგისტრირების თვალსაზრისით. ახლა კი გაჩნდება საშუალება  გარემონტებულ შენობაში უფრო მეტი ბავშვი მივიღოთ" - ამბობს თბილისის მერის მოადგილე ალუდა გოგლიჩიძე.
ბაგა-ბაღების მართვის სააგენტოს ხელმძღვანელის თქმით, 56-ე საბავშვო ბაგა-ბაღი სააგენტოს ახალი ადმინისტრაციისთვის ერთ-ერთი მწვავე პრობლემა იყო. "ჩვენ ფორს-მაჟორულ სიტუაციაში მოგვიხდა სწრაფი გადაწყვეტილებების მიღება აღნიშნული საკითხის გადასაჭრელად, რომ 210-მდე ბავშვი არ დარჩენილიყო ბაგა-ბაღის გარეთ, სანამ სარემონტო-აღდგენითი სამუშაოები დასრულდებოდა. მნიშვნელოვანია ისიც, რომ ახალი სააღმზრდელო წლიდან ახალ გარემონტებულ და კეთილმოწყობილ ბაგა-ბაღში, უფრო მეტი ბავშვი ჩაერთვება სააღმზრდელო პროცესში" -განაცხადა თემურ თორდინავამ.
დაზიანებული შენობის აღდგენის პარალელურად მიმდინარეობს 56-ე საბავშვო ბაგა-ბაღში ახალი ღობის სამონტაჟო სამუშაოები.

 

სიახლე
26 იანვარი 2015  
 
 

ნაძალადევის რაიონში, თიანეთის ქუჩაზე ასფალტის საფარის დაგება დაიწყო. საერთო ფართობით 11, 634 კვადრატული მეტრის ქუჩის კაპიტალური შეკეთება 2015 წლის თებერვალში დასრულდება. პროექტის ღირებულება 615 000 ლარია.
პროექტის მიხედვით, მოიხსნა დაზიანებული საფუძველი, მოეწყო გრუნტი და საფუძვლის ზედა და ქვედა ფენა. ასევე, გათვალისწინებულია არსებული საკომუნიკაციო ჭების გზის ნიშნულამდე მოყვანა, ასფალტის საფარის ზედა ფენების დაგება, ტროტუარებისა და ბორდიურების მოწყობა. 
თიანეთის ქუჩის რეაბილიტაცია 2014 წლის ნოემბერში დაიწყო. სამუშაოებს კომპანია „გერალი“ აწარმოებს.

სიახლე
12 იანვარი 2015  
 
 

ჭავჭავაძის 68-ში სასტუმრო "ბუდაპეშტის"  მშენებლობისასთან დაკავშირებული ფაქტობრივი გარემოებების არასწორი ინტერპრეტაციის არაერთი მცდელობის გამო და საკითხისადმი საზოგადოების მაღალი ინტერესიდან გამომდინარე, ქალაქ თბილისის მერია საჭიროდ მიიჩნევს საკუთარი პოზიციისა და საკითხთან დაკავშირებული გარემოებების კიდევ ერთხელ დაფიქსირებას.
იმ ფაქტმა, რომ ჭავჭავაძის 68-ში მდებარე სასტუმრო "ბუდაპეშტის" ტერიტორია ექცევა ვაკის პარკის არსებულ საზღვრებს გარეთ, თბილისის წინა ხელისუფლებას შესაძლებლობა მისცა გაეცა სასტუმროს მშენებლობის ნებართვა. ამისთვის თბილისის ყოფილი მერის 2013 წლის 24 ივლისის #1592 განკარგულებით გახორციელდა სპეციალური ზონალური შეთანხმება და განისაზღვრა მიწის ნაკვეთის განაშენიანების (განაშენიანების ინტენსივობის) კოეფიციენტები. 2013 წლის 20 სექტემბერს კი აღნიშნულის საფუძველზე გაიცა მშენებლობის ნებართვა.
დღეის მდგომარეობით, აღნიშნული მშენებლობის დასაშვებობის საკითხს განიხილავს თბილისის მერიის ფარგლებში შექმნილი, პრობლემური მშენებლობების შემსწავლელი შესაბამისი კომისია, რომლის შემადგენლობაშიც შედიან ქ. თბილისის მერიის, საკრებულოს, ეკონომიკისა და მდგრადი განვითარების სამინისტროს წარმომადგენლები, სპეციალისტები, ექსპერტები და არასამთავრობო ორგანიზაციათა მოწვეული წარმომადგენლები.
კომისიამ 2014 წლის 02 დეკემბერს ერთხელ უკვე იმსჯელა არა მხოლოდ აღნიშნულ მშენებლობაზე, არამედ ვაკის პარკის დღევანდელი საზღვრების გაფართოვების საკითხზეც და ამ ეტაპზე მიიღო შემდეგი გადაწყვეტილება: 

1.  აღნიშნული მიწის ნაკვეთი მდებარეობს გამწვანებული ზონის სიღრმეში და სასტუმრომდე მისასვლელი გზა არასაკმარისი იქნება ტრანსპორტის ორმხრივი მოძრაობისათვის. ამასთანავე, დაუშვებელი და გამორიცხულია აღნიშნულ ტერიტორიაზე გზის გასაფართოვებლად ხის ჭრის ნებართვის გაცემა. 

2. ვინაიდან საქმეს განიხილავს სასამართლო, კომისია საკითხის არსებით განხილვას ვერ დაიწყებს, ვიდრე სასამართლო არ მიიღებს გადაწყვეტილებას. 

3. მიწის ნაკვეთის ჩანაცვლების საკითხზე კომპანიის წარმომადგენლებს დაფიქრებისათვის მიეცეთ გარკვეული დრო და შესაძლებელობა შეარჩიონ ალტერნატიული ტერიტორია. 

4. კომისია აუცილებლად მიიჩნევს ვაკის პარკისა და მისი მიმდებარე გამწვანებული ტერიტორიის დაცვას შემდგომი მშენებლობებისგან.  ის გარემოება, რომ აღნიშნულ ტერიტორიას მინიჭებული აქვს სარეკრეაციო ზონის სტატუსი არ აღმოჩნდა საკმარისი გამწვანებული ზონის ეფექტური დაცვისთვის. ამიტომ, კომისიამ მოიწონა ვაკის პარკის დღეის მდგომარეობით არსებული საზღვრების (რომელიც მხოლოდ კულტურული მემკვიდრეობის ძეგლის სტატუსის მქონე მცირე მონაკვეთს მოიცავს) გაფართოების საკითხი.“

გარდა ამისა, თბილისის მერიის ზედამხედველობის სამსახურმა გამოავლინა შეთანხმებული არქიტექტურული პროექტის დარღვევა. კერძოდ, ამოღებული ქვაბული ერთერთი ფასადის მხარეს გაცდენილია საკადასტრო წითელ ხაზებს, რის საფუძველზეც ზედამხედველობის სამსახურმა დააჯარიმა მშენებლობის დამკვეთი (მშენებლობის დამკვეთიად ჯერ კიდევ ფიქსირდება შპს „გრაალი“, მესაკუთრედ ფიქსირდება შპს „ტიფლის კოსტავა“). მოქმედი კანონმდებლობის შესაბამისად, ვიდრე არ მოხდება ხარვეზის გამოსწორება სამშენებლო სამუშაოები ვერ გაგრძელება.
ამრიგად, მოვუწოდებთ ყველას, განსაკუთრებით კი მედია საშუალებებს და მშენებლობით დაინტერესებულ მხარეს, ნუ შეიყვანენ  საზოგადოებას შეცდომაში. მედია საშუალებებს ასევე მოვუწოდებთ არ გაავრცელონ გადაუმოწმებელი ინფორმაცია, გაითვალისწინონ საკითხის სენსიტიურობა და თემის გაშუქებისას ნუ იქნებიან მიკერძოებული ამა თუ იმ ინტერესის სასარგებლოდ, რაც, სამწუხაროდ,  ბოლო დღეებში გამოიკვეთა ზოგიერთი მედიასაშუალების მხრიდან.

 

 

სიახლე
26 იანვარი 2015  
 
 

ერეკლე II-ს ქუჩაზე, ნაძვის ხეების ფესტივალი, ტელე კომპანია "GDS"-ის გამარჯვებით, დასრულდა. საუკეთესო ნაძვის ხე ხმის დამთვლელმა კომისიამ ჟურნალისტებთან ერთად გამოავლინა. კომისიის წევრები თამარ ფოცხიშვილი, მსახიობი ნიკა წულუკიძე და თბილისის მერიის კულტურული ღონისძიებების ცენტრის ხელმძღვანელი ზურაბ წერეთელი იყვნენ.
ნაძვის ხეების ფესტივალი საახალწლო ღონისძიებების ფარგლებში, თბილისის მერიის ორგანიზებით, 25 დეკემბერს დაიწყო და 7 იანვარს დასრულდა. ორი კვირის განმავლობაში ერეკლე II-ს ქუჩის სტუმრებს საშუალება ჰქონდა დაეთვალიერებინა სხვადასხვა წამყვანი ბიზნეს და ტელე კომპანიების მიერ წარმოდგენილი ნაძვის ხეები და ხმა მიეცათ საუკეთესოს გამოსავლენად. 
ფესტივალში მონაწილე კომპანიებს შორის იყო: ”Wissol” ჯგუფი, ტელეკომპანია ”რუსთავი 2”, ტელე კომპანია ”GDS”, ტურიზმის ეროვნული სააგენტო, ”დინამო თბილისი”, კომპანია ”ახალი ქსელები”, დიზაინერი აკა ნანიტაშვილი, მაღაზია ”პროვანსი”, მაღაზია ”ქრონოგრაფი”, ღვინის კომპანია „კახური ტრადიციული მეღვინეობა“, გაზეთი ”პრაიმ ტაიმი”, კომპანია ”კაპაროლი” და კომპანია ”კონტრალო”.
გამარჯვებულ ნაძვის ხეს თბილისის მერიის მიერ დამზადებული სიმბოლური პრიზი გადაეცა.

სიახლე
7 იანვარი 2015  
 
 

თბილისის მერი  დავით ნარმანია  გლდანის რაიონში მდებარე „დიდი ხევძმარას“ და „სააფთრის ხევის“  სანიაღვრე კოლექტორების სარეაბილიტაციო სამუშაოებს კეთილმოწყობის საქალაქო სამსახურის უფროსთან ავთანდილ სუდაძესთან ერთად  გაეცნო.
კოლექტორებში, რომლის სიგანე 6, სიმაღლე კი 4 მეტრია, ნაზვავი გრუნტის მასები ჩაედინება, რის გამოც მათი გამტარუნარიანობა 90%-ით არის შემცირებული და კიდევ უფრო აზიანებს ნაგებობას. სარეაბილიტაციო პროექტების ფარგლებში იგეგმება დაზიანებული მონაკვეთის დემონტაჟი, მიწის სამუშაოები, დაზიანებული კოლექტორის მოსაწყობად  ჩატარდება მოსამზადებელი სამუშაოები,  შემდეგ კი დაიწყება ნაგებობების მშენებლობა. სარეაბილიტაციო სამუშაოები მიმდინარე წლის მაისში დასრულდება.
„ დედაქალაქში ძალიან დიდი პრობლემაა სანიაღვრე სისტემასთან დაკავშირებით, რის გამოც, წვიმის დროს ქალაქის დიდი ნაწილი იტბორება. ამ მიმართულებით გადაუდებელი სამუშაოებისთვის მიმდინარე წლის  ბიუჯეტში 4 000 000 ლარზე მეტი გავითვალისწინეთ. მათ შორისაა აღნიშნული  ობიექტები. თავის დროზე ამ ადგილზე ძალიან ბევრი სამშენებლო ნარჩენი დაიყარა, რასაც სისტემამ ვერ გაუძლო და ჩაინგრა. ეს არის ერთ–ერთი ყველაზე მძლავრი სისტემა, რომელიც მდინარე მტკვარს უერთდება. სამუშაოების დასრულების შემდეგ, სანიაღვრე ქსელი სრულად აღდგება“ - განაცხადა დავით ნარმანიამ.
„დიდი ხევძმარას“ სამშენებლო-სარეაბილიტაციო სამუშაოებისთვის დედაქალაქის ბიუჯეტიდან 665 898 ლარია გამოყოფილი. სამუშაოებს შპს „ პალიტრა“ ახორციელებს.
„სააფთრის ხევის“ სარეაბილიტაციო სამუშაოებისთვის გამოყოფილია 1 355 000 ლარი. სამუშაოებს შპს „საბა ქონსთრაქშენი“ აწარმოებს.

 

 

 

 

 

 

 

 

 

სიახლე
25 იანვარი 2015  
 
 

დღეს ერეკლე II-ის ქუჩაზე ნაძვის ხის ფესტივალი გაიხსნა. სხვადასხვა წამყვანი კომპანიის საიმიჯო ნაძვის ხეები ორი კვირის განმავლობაში იქნება გამოფენილი და მათ შორის საუკეთესო ნაძვის ხე ფესტივალის ბოლოს გამოვლინდება. გამარჯვებულ ნაძვის ხეს ერეკლე II-ის ქუჩის სტუმრები ხმის მიცემით შეარჩევენ.
ნაძვის ხეების ფესტივალი წინასაახალწლო ღონისძიებების ფარგლებში მიმდინარეობს და 7 იანვარს საზეიმო დაჯილდოებით დასრულდება.

სიახლე
25 დეკემბერი 2014  
 
 

ზაჰესის დასახლებასთან მდებარე სარკინიგზო გზაგამტარი ხიდისა და ხიდი - აკვედუკის რეკონსტრუქცია იწყება.  ამ მიზნით, ორივე ხიდი  კვირას, 25 იანვარს, 24:00 საათიდან დაიკეტება. რეკონსტრუქციის გამო დაკეტილი ხიდების ნაცვლად, ტრანსპორტის მოძრაობა შემოვლითი გზებით, ზაჰესის მიმართულებით მცხეთის გზიდან, დიღმის მიმართულებით - გლდანიდან იქნება შესაძლებელი.
თბილისის მერიის კეთილმოწყობის საქალაქო სამსახურის უფროსის, ავთანდილ სუდაძის თქმით, სარეკონსტრქციო სამუშაოები, რომელსაც  შპს „სამშენებლო კომერციული კორპორაცია ხიდი“ აწარმოებს, 400 დღის მანძილზე გაგრძელდება. მისივე თქმით, პროექტისთვის დედაქალაქის ბიუჯეტიდან 4 462 000 ლარია გამოყოფილი.
"დღეის მდგომარეობით, სარკინიგზო გზაგამტარი ხიდი და ხიდი-აკვედუკი ამ ტიპის ნაგებობების საექსპლუატაციო სტანდარტებს არ შეესაბამება.  ნაგებობების რეკონსტრუქცია 2013 წელს ჩატარებული გამოკვლევების დასკვნის საფუძველზე, თანამედროვე სტანდარტებით  მოხდება" - განაცხადა ავთანდილ სუდაძემ.
პირველ ეტაპზე სრული დემონტაჟი ჩაუტარდება 35 მეტრის სიგრძის და 11.60 მეტრის სიგანის სარკინიგზო გზაგამტარის რკინა-ბეტონის კონსტრუქციას, რის შემდეგაც აშენდება ახალი ხიდი. უსაფრთხოებისა და ახალი ტექნოლოგიების სტანდარტების დაცვით მოეწყობა ბურჯები,  ფერდის გასამაგრებელი საყრდენი კედელი, სავალი ნაწილი, ტროტუარები და ბორდიურები.
უსაფრთხოებისა და ახალი ტექნოლოგიების სტანდარტების დაცვით განხორციელდება ხიდი - აკვედუკის რეკონსტრუქციაც,  რომლის სიგრძე 120, სიგანე კი 12 მეტრია. მოხდება ნაგებობის დემონტაჟი, ბურჯების გარდა, მოეწყობა ხიდთან არსებული ფერდის გასამაგრებელი კედელი,  სავალი ნაწილი, ტრორუარები და ბორდიურები.
ზაჰესის სარკინიგზო გზაგამტარი ხიდი და ხიდი - აკვედუკი გასული საუკუნის 50-იან წლებში აშენდა. ნაგებობების  სარეკონსტრუქციო სამუშაოები 80-იანი წლების შემდეგ  არ ჩატარებულა.

 

 

 

სიახლე
24 იანვარი 2015  
 
 

თბილისის მერმა დავით ნარმანიამ დედაქალაქში  მცხოვრებ სხვადახვა ქრისტიანული კონფესიის მრევლს შობა მოილოცა.
დავით ნარმანია კათოლიკურ ეკლესიაში სადღესასწაულო წირვას  საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრ სოზარ სუბართან, შერიგებისა და სამოქალაქო თანასწორობის საკითხებში სახელმწიფო მინისტრ პაატა ზაქარეიშვილთან და რელიგიის საკითხთა სახელმწიფო სააგენტოს ხელმძღვანელ ზაზა ვაშაყმაძესთან ერთად დაესწრო, რის შემდეგაც შობის დღესასწაული მთავრობის წევრებთან ერთად “ორმოცდაათიანელებს” მიულოცა. 
"მოვედით, რათა  მოგილოცოთ და თქვენთან ერთად გავიზიაროთ ქრისტეშობის დღესასწაული, რომელიც ისევე, როგორც მაცხოვრის აღდგომა, ყველა ქრისტიანს გვაერთიანებს. შობა განსაკუთრებით მნიშვნელოვანია, როგორც პირველწყარო, დასაწყისი და დასაბამი ქრისტიანული რწმენისა.  შობის სასწაულით იწყება უფლის განკაცება. ეს ის დღეა, როცა სამყარო ერთად ზეიმობს, როცა კეთილმა სძლია ბოროტს. ჩვენ ვართ ერთნი და ამ ერთობით მინდა დღევანდელი დღე მოგილოცოთ"- მიმართა დავით ნარმანიამ კათოლიკური ეკლესიისა და „ორმოცდაათიანელების“ მრევლს და მათ ერთიანობა და სულის სიმტკიცე უსურვა.

სიახლე
25 დეკემბერი 2014  
 
 

თბილისის მერიამ ნაძალადევის რაიონში, დადიანის გამზირის სარეაბილიტაციო სამუშაოების შესრულებაზე ტენდერი გამოაცხადა. სატენდერო პირობების თანახმად, სარეაბილიტაციო სამუშაოები უნდა ჩატარდეს დადიანის გამზირის  900 მეტრის სიგრძის მონაკვეთზე, ე.წ. „მალაკნების“ ხიდიდან ხუდადოვის ქუჩის შესახვევამდე. ქუჩის აღნიშნულ მონაკვეთზე 10 წელია, კაპიტალური სამუშაოები არ ჩატარებულა. უკვე დასრულებულია მიწისქვეშა საკომუნიკაციო სამუშაოები. სატენდერო წინადადებების მიღება 6 თებერვალს დაიწყება და 11 თებერვალს დასრულდება. პრეტენდენტების გამოვლენის შემდეგ გამარჯვებულ კომპანიასთან გაფორმდება ხელშეკრულება სამუშაოების დაწყებაზე.
გზის კაპიტალური შეკეთებისთვის თბილისის ბიუჯეტიდან 2 311 000 ლარია გამოყოფილი.

 

 

 

სიახლე
23 იანვარი 2015  
 
 

თბილისის  შემოგარენში  სამშენებლო ნარჩენებისთვის სპეციალური ტერიტორია გამოიყო. ამის შესახებ თბილისის მერმა დავით ნარმანიამ დედაქალაქის მთავრობის სხდომაზე განაცხადა. მისი თქმით, ნაგავსაყრელი გლდანის ტერიტორიაზე, 12 ჰა ფართობზე განთავსდება.
თბილისის მერმა შპს „თბილსერვის ჯგუფს“ და ზედამხედველობის სამსახურს ნარჩენების განთავსებისთვის  მოსაკრებლის შემოღება დაავალა. მისი თქმით, მოსაკრებლისგან მიღებული თანხა სამშენებლო ნარჩენების პოლიგონის მოწესრიგებას მოხმარდება. ამასთან, თბილისის მერი მიესალმება ცენტრალური ხელისუფლების გადაწყვეტილებას ქალაქში ნარჩენების გადაყრისთვის ჯარიმების გაზრდის თაობაზე.
"სამშენებლო ნარჩენებთან დაკავშირებით ქალაქში ქაოსია, განსაკუთრებით ცენტრალური უბნების გარეთ. ვაფრთხილებ ყველა კომპანიას, ფიზიკურ თუ იურიდიულ პირს, რომელსაც გააქვს სამშენებლო ნარჩენი და ყრის ნებისმიერ ადგილზე, მიმართონ  შპს „თბილსერვისს“, რათა კომპანიამ  მიუთითოს მათ, თუ სად განათავსონ ნარჩენები", - განაცხადა დავით ნარმანიამ.
შპს „თბილსერვის ჯგუფის“ უფროსის მოადგილის, ლევან ჯღარკავას განცხადებით, სამშენებლო ნარჩენებისათვის ნაგავსაყრელი აქამდე არ არსებობდა. მისივე თქმით, ნაგავსაყრელისთვის განკუთვნილი ტერიტორიის „თბილსერვის ჯგუფისათვის“ გადაცემის შემდეგ, ტერიტორია მაქსიმალურად შემჭიდროვებულ ვადებში კეთილმოეწყობა.

 

 

 

სიახლე
21 იანვარი 2015  
 
 

ნაძალადევის რაიონში სპორტული მოედნების რეაბილიტაციის პროცესი აქტიურ ფაზაშია. რაიონის გამგებელმა ზაზა გაბუნიამ მოსახლეობასთან ერთად დღეს თემქაზე, 48-ე სკოლის ეზოში მდებარე განახლებული სტადიონი გახსნა. 450 კვ/მ ფართობის მოედანზე დაიგო ახალი, ხელოვნური მწვანე საფარი, განახლდა ფეხბურთისა და კალათბურთის კარები; სპორტული მოედნის გარშემო დამონტაჟდა ახალი ტექნოლოგიის ლითონის ბადე, რომელიც უსაფრთხოების მიზნით მოქცეულია პლასტმასის კონსტრუქციაში.
ნაძალადევის გამგებლის ზაზა გაბუნიას თქმით, დეკემბრის ბოლომდე კიდევ 3 სტადიონის რეაბილიტაცია დასრულდება.

 

სიახლე
13 დეკემბერი 2014  
 
 

თბილისის მერის დავით ნარმანიას დავალებით, დედაქალაქში არსებული მიწისქვეშა გადასასვლელები შპს “უძრავი ქონება - თბილისის” დაქვემდებარებაში გადავა.
როგორც მთავრობის დღევანდელ სხდომაზე დავით ნარმანიამ განაცხადა, წინა ხელისუფლების დროს მიწისქვეშა გადასასვლელების მოვლა პატრონობა სამ სხვადასხვა უწყებაზე იყო გადანაწილებული და პასუხისმგებლობები მკაფიოდ არ იყო განსაზღვრული.
მისივე თქმით, შპს “უძრავი ქონება - თბილისი“, რომელიც ამიერიდან დედაქალაქში  არსებულ 41-ვე მიწისქვეშა გადასასვლელის კეთილმოწყობაზე იზრუნებს, თბილისის მერიის დაქვემდებარებაშია.
თბილისის მერმა დღეს პირველი დავალებებიც გასცა. კერძოდ, კომპანიის ხელმძღვანელობას მიწისქვეშა გადასასვლელების დასუფთავებისთვის 10 დღიანი ვადა მიეცა. გარდა ამისა, არსებული რესურსებით მიწისქვეშა გადასასვლელების მოსაწესრიგებლად და განათების უზრუნველსაყოფად  კომპანიას  გეგმა გრაფიკის შემუშავება დაევალა, რომლის შესრულებას დავით ნარმანია პირადად გააკონტროლებს. თბილისის მერის თქმით,   მოსაწესრიგებელია ფართების გაქირავებიდან მიღებული შემოსავლების საკითხიც.
„თბილისის 2015 წლის ბიუჯეტში მიწისქვეშა გადასასვლელების მოწესრიგებაზე ერთ მილიონ ლარზე მეტია  გათვალისწინებული. რამდენიმე მიწისქვეშა გადასასვლელში დაიწყო კეთილმოწყობის სამუშაოები, შეზღუდული შესაძლებლობის პირებისთვის დამონტაჟდა ლიფტები,  მოწესრიგდა განათება“ - განაცხადა დავით ნარმანიამ.

 

 

სიახლე
21 იანვარი 2015  
 
 

თბილისის მერიასა და ირლანდიის დედაქალაქ დუბლინის მერიას შორის ურთიერთგაგების მემორანდუმი გაფორმდა. დედაქალაქის მერის ირლანდიაში ვიზიტის ფარგლებში, მემორანდუმს ხელი მოაწერეს დავით ნარმანიამ და დუბლინის ლორდ მერმა ქრისტი ბრუკმა.
მემორანდუმის თანახმად, მხარეები ერთმანეთს გაუზიარებენ ცოდნასა და გამოცდილებას ეკონომიკის, კულტურის, განათლების, ტურიზმის, საზოგადოებრივი ტრანსპორტის, გარემოს დაცვის, მყარი ნარჩენების მართვისა და ადგილობრივი მმართველობის სფეროში.
როგორც ირლანდიიდან დაბრუნებულმა თბილისის მერმა დღეს გამართულ ბრიფინგზე ოფიციალური ვიზიტის შეჯამებისას განაცხადა, თბილისი და დუბლინი ორ ძალიან მნიშვნელოვან - გამწვანების და საცობების მართვის საკითხებში ითანამშრომლებენ.
„მე უკვე მოვიწვიე ორი სპეციალისტი ირლანდიიდან, რომლებიც შეისწავლიან დედაქალაქის სატრანსპორტო სისტემის მართვის ნაწილს და გაგვიწევენ რეკომენდაციებს, როგორ განვავითაროთ იგი თანამედროვე ტექნოლოგიების გამოყენებით, რათა შევძლოთ საცობების მართვა“ - განაცხადა დავით ნარმანიამ.
მისი თქმით, სხვა პრიორიტეტებს შორის, ერთ-ერთი უმთავრესი პრიორიტეტი დედაქალაქში ეკოლოგიური მდგომარეობის გაუმჯობესებაა, ამდენად, ძალიან  მნიშვნელოვანია ირლანდიის მიდგომები ამ კუთხით. მისივე თქმით, ქართული მხარე დაამუშავებს მათ მოდელს და საუკეთესო პრაქტიკაზე დაყრდნობით გააუმჯობესებს დედაქალაქის ეკოლოგიურ მდგომარეობას.

 

 

 

 

 

 

 

სიახლე
12 დეკემბერი 2014  
 
 

საგანგებო და გადაუდებელი სიტუაციების მართვის სააგენტო შინაგან საქმეთა სამინისტროს დაქვემდებარებაში გადავიდა. როგორც დედაქალაქის მთავრობის დღევანდელ სხდომაზე თბილისის მერმა დავით ნარმანიამ განაცხადა, საგანგებო სიტუაციების სამსახური ქვეყნის მასშტაბით ცენტრალიზებული გახდა. ამდენად, სახანძრო -სამაშველო სამსახური  შინაგან საქმეთა სამინისტროს დაექვემდებარა.
მისივე თქმით, საგანგებო და გადაუდებელი სიტუაციების მართვის სააგენტოს გამოეყო და ცალკე ჩამოყალიბდა სსიპ „ცხოველთა მონიტორინგის სამსახური“, რომელიც თბილისის მერიის დაქვემდებარებაში რჩება. გარდა ამისა, მერიის დაქვემდებარებაში რჩება ასევე სასწრაფო სამედიცინო სამსახური. 

სიახლე
21 იანვარი 2015  
 
 

მედიასაშუალებებით გავრცელებული ინფორმაცია, რომ საქართველოს პროკურატურის წარმომადგენლები იმყოფებიან თბილისის მერიაში და მიმდინარეობს საგამოძიებო მოქმედებები "თბილისობის" დღესასწაულთან დაკავშირებული შესყიდვის დოკუმენტაციის ამოღების მიზნით, სიმართლეს არ შეესაბამება.
საზოგადოებას ვაცნობებთ, რომ აღნიშნულ საკითხზე მთავარ პროკურატურაში მიმდინარეობს გამოძიება ხსენებული შესყიდვების კანონიერების დასადგენად და გამოძიების პროცესში თბილისის მერია აქტიურად არის ჩართული.
ვინაიდან საზოგადოებაში გაჩნდა კითხვები "თბილისობის" დღესასწაულთან დაკავშირებით განხორციელებულ შესყიდვებზე, თბილისის მერია გამოძიებას მიაწოდებს სრულ დოკუმენტაციას, რისი მოგროვების პროცესიც მიმდინარეობს და აპირებს მჭიდრო თანამშრომლობის გაგრძელებას გამოძიებასთან სიმართლის დასადგენად.

სიახლე
9 დეკემბერი 2014  
 
იხილეთ მეტი