23:35     22/08/2014   Tbilisi.gov.ge
   
 
 

„შპს „სითი-პარკსა“ და თბილისის მერიას შორის გაფორმებულ ხელშეკრულებაში შესატანი ცვლილებები ხელმომწერმა მხარეებმა სექტემბრის ბოლომდე უნდა მოამზადონ“ - ეს არის ერთ-ერთი პუნქტი იმ მოთხოვნებიდან, რომელიც დედაქალაქის მერმა დავით ნარმანიამ კომპანია „სითი პარკის“ ხელმძღვანელობას  დღევანდელი 4-საათიანი შეხვედრის შემდეგ გააცნო. დავით ნარმანიას დავალებით, მხარეები სექტემბრის ბოლომდე უნდა მოემზადონ გონივრული და გაანგარიშებული ცვლილებების განხორციელებისთვის, ისე, რომ მხარეთა თანასწორობა  უზრუნველყოფილი იყოს“.
რაც შეეხება მოქმედ ხელშეკრულებას, რომლის დეტალები საზოგადოებისთვის ამ დრომდე კონფიდენციალურია,  დოკუმენტი,  მასში შეტანილი სამივე  ცვლილებით, დედაქალაქის მერიისა და საკრებულოს ვებ-გვერდებზე უახლოეს დღეებში გამოქვეყნდება.
გარდა ამისა, თბილისის მერის დავალებით, „სითი პარკმა“ სექტემბრის ბოლომდე თბილისის მთავრობას უნდა წარუდგინოს:  თბილისის მთავრობასა და შპს „სითი პარკს“ შორის  2007 წლის ბოლოს  გაფორმებულ ხელშეკრულებაში შეტანილი სამივე ცვლილების არგუმენტაცია და ცვლილებებთან დაკავშირებული მიმოწერა;  ყოველწლიური ბრუნვის შესახებ ფინანსური დოკუმენტაცია;  კომპანიის წლიური ანგარიში; კომპანიის სამომავლო გეგმები (წერილობითი სახით); კონკრეტული დასაბუთება და გაანგარიშება იმის შესახებ, თუ რამ განაპირობა 2010 წელს მიღებული გადაწყვეტილება პარკირების გადასახადის  25-დან 50 ლარამდე გაზრდის შესახებ, რასაც თან უნდა დაერთოს მიმოწერა, რომელიც  ქალაქის მთავრობას დაარწმუნებს იმაში, რომ ტარიფის გაზრდა გარდაუვალი იყო; კომპანია „სითი-პარკის“ ამჟამინდელი და ყოფილი თანამშრომლების ნუსხა; ინფორმაცია საშვებისა და საჯარიმოებიდან მიღებული შემოსავლების, ასევე, გადაუხდელი ჯარიმების შესახებ.
„ჩვენ ბოლო დღეების განმავლობაში ძალიან ინტენსიურად ვიმუშავეთ „სითი-პარკთან“ გაფორმებული ხელშეკრულების  ანალიზზე, ასევე, გავეცანით მასთან მიმოწერას, ფინანსურ დოკუმენტაციას, რამაც მიგვიყვანა იმ დასკვნამდე, რომ კომპანიასთან გაფორმებული ხელშეკრულება კაბალურია და მხოლოდ და მხოლოდ  კომპანიის და მასთან დაკავშირებული პირების წისქვილზე ასხამს წყალს. არცერთი მუხლი, ნორმა,  რეგულაცია არ არის თბილისის და თბილისელების სასარგებლოდ, ყველა რეგულაცია არის კონკრეტულად კომპანია „სითი-პარკის“ სასარგებლოდ. მათ შორის, რამდენიმე ძალიან მძიმე ნორმაა, რომელიც დიდ ვალდებულებებს გვაკისრებს და აქედან გამომდინარე, ვითარებას ართულებს. კერძოდ, ბუნდოვანია 25-დან 50 ლარამდე პარკირების საფასურის გაზრდის გადაწყვეტილება. 2010 წლის 27 სექტემბერს „სითი-პარკმა“ მიმართა თბილისის მერიას, მინიმუმ ორჯერ გაეზარდა ტარიფი, რაზეც თბილისის მთავრობამ ძალიან სწრაფად, მეორე დღესვე მიიღო გდაწყვეტილება. აქედან გამომდინარე, დეტალურად არის გამოსაძიებელი, რა ედო ამ ყველაფერს საფუძვლად. არავითარი გაანგარიშება ტარიფის ზრდასთან და მის აუცილებლობასთან დაკავშირებით არ არის წარმოდგენილი. ამიტომ ჩვენ დავავალდებულეთ კომპანია „სითი-პარკი“, დეტალურად წარმოადგინოს: რამ გამოიწვია ხელშეკრულებაში  სამჯერ ზედიზედ ცვლილების შეტანა, ეს ხდებოდა  თბილისის მერიის თუ  კომპანიის  მოთხოვნის საფუძველზე. მოვითხოვეთ აუდიტორული შემოწმების დასკვნა და ინფორმაცია სამომავლო გეგმებთან დაკავშირებით. ამ დამატებითმა ინფორმაციამ  ჩვენ საბოლოო გადაწყვეტილების მიღების საფუძველი უნდა მოგვცეს. სექტემბრის ბოლოს ერთი მხრივ, „სითი-პარკი“, ხოლო მეორე მხრივ, თბილისის მთავრობა მოამზადებს წინადადებებს ხელშეკრულებაში შესატან ცვლილებებთან დაკავშირებით,“- განაცხადა დავით ნარმანიამ.
მისივე თქმით, კითხვის  ნიშნებს აჩენს კომპანიის განმარტება, გიგი უგულავას სატელევიზიო განცხადებაზე, რომლითაც ხელშეკრულება უნდა შეცვლილიყო და რასაც „სითი პარკი“ მეორე დღესვე წერილობით დაეთანხმა. ეს ადასტურებს მხარეებს შორის წინასწარ შეთანხმებულ გარიგებას.
რაც შეეხება იმას, ხომ არ მოითხოვს მერია კომპანიაში ფინანსური პოლიციის შესვლას, დავით ნარმანიას თქმით, „სითი-პარკი“ არ არის თბილისის მერიის მიერ დაფუძნებული შპს და შესაბამისად, ამ მოთხოვნით საგამოძიებო ორგანოებს ვერ მიმართავს.
კომპანია „სითი-პარკის“ ხელმძღვანელობასთან თბილისის მთავრობის წევრთა შეხვედრა   მერიაში ყოველკვირეული ტრადიციული შეხვედრების ფორმატში გაიმართა.

 

სიახლე
22 აგვისტო 2014  
 
 

თბილისის საკრებულოში დღეს ურბანული დაგეგმარებისა და საქალაქო მეურნეობის კომისიის სხდომა გაიმართა, რომელსაც თბილისის მერის მოადგილე გიორგი სოლომონია და კეთილმოწყობის საქალაქო სამსახურის უფროსი ავთანდილ სუდაძე დაესწრნენ. კომისიის სხდომაზე სამსახურის უფროსმა კეთილმოწყობის კუთხით ქალაქში არსებულ მდგომარეობაზე ისაუბრა და პრობლემების მოგვარების გზებზე იმსჯელა.
ავთანდილ სუდაძის თქმით, ის აპირებს სამსახურის კომპეტენციის ფარგლებში ყველა მიმართულებით პროექტების დახვეწას. ეს იქნება, როგორც საგზაო ინფრასტრუქტურის გაუმჯობესება, ასევე ავარიული სახლების გამაგრებითი სამუშაოები, მიწისქვეშა გადასასვლელების მოვლა-პატრონობა და სხვა აქტუალური პროექტები.
კომისიის სხდომაზე გადაწყდა, რომ მსგავსი შეხვედრები თბილისის საკრებულოში სისტემატიურად გაიმართება. 

სიახლე
22 აგვისტო 2014  
 
 

თბილისის მერიისა და საქართველოს საპატრიარქოს ინიციატივით,  სოციალურად დაუცველი, მრავალშვილიანი ოჯახების 10-18 წლამდე ასაკის ბავშვები (40-მდე ბავშვი) დღეს სხვადასხვა ეპარქიის მონასტრებში გაემგზავრნენ. მოზარდები ერთი კვირის განმავლობაში სამონასტრო ცხოვრებას ეზიარებიან.
ბავშვები თბილისის მერიის სოციალური მომსახურებისა და კულტურის საქალაქო სამსახურის უფროსმა გელა ჩივიაშვილმა და საქართველოს საპატრიარქოს წარმომადგენლებმა გააცილეს.

სიახლე
22 აგვისტო 2014  
 
 

დღეს თბილისის მერი დავით ნარმანია საერთაშორისო საავტომობილო ტურისადმი - "მოგზაურობა ათიათასკილომეტრიან აბრეშუმის გზაზე" მიძღვნილ ღონისძიებას დაესწრო.
საზეიმო ღონისძიება ჩინური საინვესტიციო კომპანია "ჰუალინგ ჯგუფის" მიერ გახსნილ "თბილისის ზღვის პლაზაში" გაიმართა. ღონისძიებას საქართველოს პრეზიდენტი, მთავრობის წევრები, დედაქალაქის მერი, ჩინეთის მხრიდან კი ოფიციალური პირები დაესწრენ. საერთაშორისო საავტომობილო ტურში  - "მოგზაურობა ათიათასკილომეტრიან აბრეშუმის გზაზე" ჩინეთის ცენტრალური ტელე-რადიო არხების, ბეჭდური მედიის, ინტერნეტ გამოცემებისა და წამყვანი საინფორმაციო სააგენტოების ცნობილი ჟურნალისტები და გადამღები ჯგუფები მონაწილეობენ. "მოგზაურობა ათიათასკილომეტრიან აბრეშუმის გზაზე" მასშტაბური კულტურულ-ეკონომიკური მედიაღონისძიებაა, რომელმაც სტარტი 2014 წლის 19 ივლისს ჩინეთის ქალაქ სიანში (ისტორიულად აბრეშუმის გზის სათავე) აიღო. ჯგუფი საქართველოში 20 აგვისტოს შემოვიდა. "მოგზაურობა ათიათასკილომეტრიან აბრეშუმის გზაზე"  ექვსი წლის განმავლობაში გაგრძელდება. ექსპედიციის შემადგენლობა ყოველწლიურად შეიცვლება. 

სიახლე
21 აგვისტო 2014  
 
 

28 აპრილიდან 15 მაისის ჩათვლით,  ტექნოლოგიური პროცესებით გათვალისწინებული სარემონტო სამუშაოებისა და გამწევი ბაგირის შეცვლასთან დაკავშირებით, „რიყე-ნარიყალას“ საბაგირო გზა დროებით შეწყვეტს მუშაობას. რიყისა და ნარიყალას დამაკავშირებელი საბაგირო 2012 წლიდან ემსახურება თბილისელებსა და დედაქალაქის სტუმრებს. გახსნის დღიდან დღემდე საბაგირო 1 298 124 მგზავრს მოემსახურა. აღნიშნული გეგმიური სამუშაოების განხორიცელებაც სწორედ მგზავრების უსაფრთხო და კომფოტული გადაადგილებისთვის ხორციელდება.

სიახლე
27 აპრილი 2014  
 
 

თბილისის საკრებულოში დღეს გამართულ განათლებისა და კულტურის კომისიის სხდომას  თბილისის მერის მოადგილე ალუდა გოგლიჩიძე და ბაგა-ბაღების მართვის სააგენტოს უფროსი თემურ თორდინავა დაესწრნენ. სხდომაზე ქალაქის მასშტაბით ბაგა-ბაღებთან დაკავშირებულ პრობლემებზე არასამთავრობო ორგანიზაციების წარმომადგენლებთან ერთად იმსჯელეს. თბილისის ბაგა-ბაღების მართვის სააგენტოს უფროსმა მიმდინარე  და დაგეგმილ სამუშაოებზე ისაუბრა.
თემურ თორდინავას თქმით, ქალაქის სხვადასხვა რაიონში უკვე დაწყებულია ალტერნატიული ფართების მოძიება იმ ბავშვების გადასანაწილებლად,  რომლებმაც ადგილების ნაკლებობის გამო, რეგისტრაცია ვერ გაიარეს. მისივე თქმით, სექტემბერში იგეგმება ახალი ბაღის მშენებლობა,  უახლოეს მომავალში კი საბავშვო ბაღებში გათბობის ცენტრალური სისტემის დამონტაჟების დასასრულებლად ტენდერი გამოცხადდება.

 

სიახლე
21 აგვისტო 2014  
 
 

გუშინ თბილისის საკრებულოს უმრავლესობამ ფაქტიურად დაადასტურა, რომ განვლილი პერიოდის განმავლობაში ბიუჯეტის არ დამტკიცება მხოლოდ და მხოლოდ მათი უარგუმენტაციო პოლიტიკური კაპრიზი იყო. ცალსახაა, რომ მათ შეეძლოთ იანვრის დასაწყისშივე გადაედგათ აქტიური ნაბიჯები და  თბილისის ბიუჯეტი დაემტკიცებინათ, თუმცა თბილისის მერია მიესალმება მათ მიერ გადადგმულ,  დაგვიანებულ ნაბიჯს.მიუხედავად მათი განცხადებისა, რომ საკრებულოს ,,ქართული ოცნების" უმრავლესობის მიერ შედგენილი ბიუჯეტი  თბილისელების ინტერესებზე ორიენტირებული იქნებოდა, თბილისის მერიის მიერ საკრებულოში წარდგენილი ბიუჯეტის მეოთხე ვარიანტისგან განსხვავებით, მათ მიერ წარმოდგენილ  ბიუჯეტის საბოლოო პროექტში  სოციალურ პროგრამებზე  10 მილიონი ლარით ნაკლები თანხაა გათვალისწინებული, ბინათმესაკუთრეთა ამხანაგობების განვითარების პროგრამა 5 მილიონი ლარით ნაკლები თანხით დაფინანსება, ხოლო  ახალი ავტობუსების შესაძენა საერთოდ არ არის გათვალისწინებული 2014 წლის ბიუჯეტში.მიგვაჩნია, რომ ამ  პერიოდის განმავლობაში თბილისელებს   შეექმნათ მწვავე სოციალური თუ სხვა ტიპის პრობლემები და შესაბამისად არ ვაპირებთ მათი ინტერესების შელახვის ხარჯზე ავყეთ საკრებულოს უმრავლესობას პოლიტიკურ კინკალობაში და მზად ვართ დამტკიცების შემდეგ ვიმუშავოთ აღნიშნული ბიუჯეტის შესაბამისად. ეს პოზიცია განპირობებულია  იმით, რომ ბიუჯეტის დაუმტკიცებლობით გამოწვეული პრობლემები გაცილებით მწვავეა ვიდრე ის პრობლემები რასაც შექმნის ,,ქართული ოცნების" მიერ შემუშავებული ბიუჯეტი.

სიახლე
7 მარტი 2014  
 
 

სამგორის რაიონის გამგებელი მამუკა ჩოქური  ვარკეთილში, ჯავახეთის #68-ში მცხოვრებ დევნილებს შეხვდა.  გამგებელმა   დევნილი და სოციალურად დაუცველი რვა ოჯახი  მოინახულა  და მათ პრობლემებს ადგილზე გაეცნო. მამუკა ჩოქური სოციალურად დაუცველებს დაპირდა, რომ მათ პრობლემებს ლტოლვილთა და განსახლების სამინისტროს წარმომადგენლებთან ერთად განიხილავს და შეძლებისდაგვარად დაეხმარება საცხოვრებელი პირობების გაუმჯობესებაში.
დღესვე საქველმოქმედო კავშირის  „მადლი 2014“-ის  და  შპს „კატრინი“-ს წარმომადგენლებმა  რაიონის გამგებელთან ერთად რვა ოჯახს, საყოფაცხოვრებო და პირველადი მოხმარების ნივთები გადასცეს.
აღნიშნულ ოჯახებს  2010   წლიდან    თვითნებურად    აქვთ დაკავებული ეკონომიკის სამინისტროს ბალანსზე არსებული ფართები. 

სიახლე
21 აგვისტო 2014  
 
 

22 აგვისტოს  თბილისის მთავრობის წევრები კომპანია „სითი პარკის“ წარმომადგენლებს შეხვდებიან და გაწეული საქმიანობის შესახებ დეტალურ ინფორმაციას მოისმენენ, - ამის შესახებ გადაწყვეტილება დედაქალაქის მთავრობის დღევანდელ სხდომაზე მიიღეს.
დეტალური ანალიზის შემდეგ კი, თბილისის მთავრობა მიიღებს კოლეგიურ გადაწყვეტილებას, თუ როგორ გაგრძელდება მომავალში მერიასა და „სითი პარკს“ შორის შემდგომი ურთიერთობა.
„ჩვენ გვაქვს კონკრეტული პრეტენზიები კომპანიის საქმიანობასთან დაკავშირებით, პრეტენზიები, რომელიც საზოგადოებიდან ობიექტურად მოდის და მე, როგორც არჩეული მერი, ვაპირებ, საზოგადოების ინტერესები ბოლომდე დავიცვა“, - განაცხადა სხდომის დასრულების შემდეგ დავით ნარმანიამ.
თბილისის მერმა კიდევ ერთხელ გაუსვა ხაზი, რომ მერიასა და „სითი პარკს“ შორის კაბალური ხელშეკრულებაა გაფორმებული. შესაბამისად იმ ადამიანებმა, ვინც ამ ხელშეკრულების მომზადებაში მონაწილეობდნენ და ვისი ხელმოწერებიც არის დაფიქსერებული,  მკაცრად უნდა აგონ პასუხი. 

სიახლე
13 აგვისტო 2014  
 
 

თბილისის მერი დავით ნარმანია შპს „ჰერმესში“ მიმდინარე საფინანსო-სამეურნეო საქმიანობის რევიზიას ეხმიანება. როგორც დავით ნარმანიამ ჟურნალისტებს განუცხადა,  მერიის დაქვემდებარებაში მყოფი ორგანიზაციების  შემოწმების თხოვნით ფინანსთა სამინისტროს საგამოძიებო სამსახურს მან თავად მიმართა.
“მე მივმართე ფინანსთა სამინისტროს საგამოძიებო სამსახურს, რათა დაეწყო მერიის დაქვემდებარებაში მყოფი იმ ორგანიზაციების საფინანსო-სამეურნეო საქმიანობის  რევიზია, რომლებიც ბოლო წლების განმავლობაში არ შემოწმებულა და სადაც არსებობს ინფორმაცია,   რომ შესაძლოა ადგილი ჰქონდეს დარღვევებს ბიუჯეტთან ანგარიშსწორების თვალსაზრისით, გაუაზრებლად მაღალ ხარჯებს და შესაბამისად, თბილისის მერიის კუთვნილი შემოსავლების ხელოვნურად შემცირებას. შპს „ჰერმესი“ არ არის გამონაკლისი“- განაცხადა დავით ნარმანიამ.
მისივე თქმით, ცალკეული ორგანიზაციების პირველადი დოკუმენტაციის ნახვის შემდეგ დასტურდება, რომ გაუაზრებლად მაღალი შრომის ანაზღაურება და პრემიები გაიცემოდა, მათ შორის, იმ ადამიანებზეც, რომლებიც, პრაქტიკულად, აღარ მუშაობდნენ ამ ორგანიზაციებში, ხდებოდა ისეთი ხარჯების გაწევა, რომელიც ჩვენი აზრით, არამიზნობრივია. არ ხდებოდა საბიუჯეტო სახსრების მომჭირნედ, ყაირათიანად ხარჯვა. საკითხს დარეგულირება სჭირდება, გაუაზრებლად მაღალი ტარიფები, მიწის უაზროდ და უკანონოდ ყიდვა-გაყიდვასთან დაკავშირებული საკითხები უნდა დამთავრდეს და მომსახურება საზოგადოებას უნდა მიეწოდოს ნორმალური ფორმით,“ - განაცხადა დავით ნარმანიამ.
მისივე თქმით,  მერიის სისტემა წლების განმავლობაში იყო დახურული და საზოგადოებას  ძალიან ბევრი კითხვა დაუგროვდა. „წინასაარჩევნო პერიოდში ამ კითხვებით მომმართავდნენ მე და მთხოვდნენ, ნათელი მომეფინა ამ საკითხებისთვის. ყველა ამ საკითხს შევისწავლით, საზოგადოებას პასუხი უნდა გავცეთ წლების განმავლობაში დაგროვილ კითხვებზე,“ - აცხადებს დავით ნარმანია.

სიახლე
21 აგვისტო 2014  
 
 

ქალაქში არსებული უფასო სასადილოების პროგრამა არ გაუქმდება, - ამის შესახებ თბილისის მერმა, დავით ნარმანიამ დღეს თბილისის მთავრობის სხომის დასრულების შემდეგ განაცხადა.
მთავრობის წევრებმა, სხვა საკითხებთან ერთად, უფასო სასადილოებთან დაკავშირებულ საკითხებზეც იმსჯელეს. მთავრობის წინა სხდომაზე თბილისის მერმა შესაბამისი საქალაქო სამსახურებს აღნიშნულ საკითხთან დაკავშირებით პირველადი ინფორმაციის წარმოდგენა დაავალა.
დავით ნარმანიას განცხადებით, საქალაქო სამსახურები ქალაქის ყველა რაიონში ახორციელებენ მონიტორინგს, რათა დაზუსტდეს იმ ადამიანთა რაოდენობა, ვინც ამ მომსახურებით სარგებლობს. „შემოსულია ახალი განცხადებები ბენეფიციარების დამატების შესახებ და ისინი უნდა დავაკმაყოფილოთ. ასევე, მნიშვნელოვანია უფასო სასადილოებში საკვების ხარისხი და ის უნდა გაუმჯობესდეს. პროგრამა აუცილებლად გაგრძელდება და იმაზე უკეთ, ვიდრე აქამდე ხორციელდებოდა“, - განაცხადა დავით ნარმანიამ. 

სიახლე
13 აგვისტო 2014  
 
 

დღეს, დედაქალაქის მთავრობის სხდომა გაიმართა, რომლის გადაწყვეტილებით, თბილისის მერია უკრაინაში დაზარალებული მოქალაქეების დახმარების მიზნით, ექიმების გამგზავრებას დააფინანსებს. აღნიშნული თხოვნით ექიმებმა თბილისის მერიას დღეს მომართეს.

სიახლე
21 თებერვალი 2014  
 
იხილეთ მეტი